Diretór ezekutivu Fundasaun Mahein (FM), Joăo Aldmeida hateten, governu halo renovasaun filafali Estadu Emerjénsia (EE) ba dala-sia, tanba númeru ema moras husi Surtu Covid-19 hahú aumenta, maibé implementasaun regra iha TL la vale ba ema hotu, tanba realidade iha fatin balun ema kumpri no balun laiha, maibé polísia rasik la halo atuasaun.
Nia fó ezemplu iha distribuisaun ai-han Sesta Bázika, maioria komunidade la kumpri ona regra distansiamentu sosial no balun mós la uza maskra.
"Agora, iha kazu sira ezekusaun estadu de emerjénsia iha ámbitu prevensaun Covid-19 ne'e, ita haree iha pontu ne'ebé dala-ruma laiha seriedade. Tanba iha aplikasaun regra ne'e, ba ema balun de'it no ema balun la kumpri medida sira ne'e," Joăo Almeida koalia asuntu ne’e iha nia kna'ar-fatin, Segunda (11/01).
Nia hatutan, iha fatin balun polísia sira aperta maka'as oinsá atu ema hotu bele kumpri, mais iha kazu balu ne'ebé bele haree hanesan iha distribuisaun Sesta Bázika, konsentrasaun ida ne'ebé la kumpri ona ba distánsia sosiál, la uza máskra.
Tuir nia, autoridade ne'ebé responsável, tenke ezekuta regra sira ho loloos hod impoin ba sidadaun sira hotu atu kumpri.
"Sé ita obriga povu baibain kumpri, mais boot sira la kumpri ba regra ida ne'e, entaun, ida ne'e ninia konsekuensia mak saida, ema sei lakon fiar ba autoridade sira ne'ebé implementa regras ne'e, tanba regras ne'e hanesan aplika ba parte balun, parte seluk la aplika", nai tenik.
Nia husu ba autoridade responsável sira atu ezekutva regra ba sidadaun hotu-hotu bele kumpri, tanba tuir nia haree medidas sira ikus-ikus ne'e polísia ba halo detensaun tanba sidadaun sira la kumpri ba regra sira ne'ebé regula kona-ba medida prevensaun Covid-19.
"Tanba ne'e, ita husu atu bele aplika regra sira ne'e ho rigór no ba ema hotu, la'os ba ema balun de'it, no mós ba ema-boot sira hanesan virus ne'e tauk sira", nia hakotu.(*)