Nia dehan, agora ekipa ne'ebé hala'o servisu hahú ona oinsá atu muda sai husi fatin atu halo konstrusaun aeroportu nian.

"Ita hotu hatene katak, prosesu la'o daudaun ona ho rasentamentu, iha ekipa rasentamentu ne'ebé mak halo servisu daudaun oinsá mak atu-bele hasai ema husi ne'ebá", dehan nia hafoin reuniaun ho Primeiru Ministru Taur Matan Ruak, iha Palásiu Governu, segunda (11/01).

Nia akresenta, Ministériu Finansa halo ona enkontru ho finansiadór sira atu- bele garantia orsamentu ba konstrusaun refere.

"Depois AFC (Internasional Finance Corporatiaon) servisu hamutuk ho ita-nia finansiadór sira-ne'ebé mak atu fó apoia ba ita, eh ha'u hanoin mais detalladamente Ministériu Finansa komesa halo hela enkontru ho ita-nia finansiadór hodi bele garante duni orsamentu iha konstrusaun, re-kualifikasaun aeroportu Prezidente Nicolau Lobato nian," dehan nia.

Nia hatutan, atu hasai komunidade sira- ne'ebé hela iha fatin planu konstrusaun aeroportu refere daudaun halo hela levantamentu.

"Ida-ne'e iha hela levantamentu para atu- bele halo servisu ida-ne'e," nia akresenta.

Alende ne'e, nia mos afirma, prosesu portu Tibar, presiza hadi'a kondisaun hanesan estarda husi rotunda Prezidente Nicolau Lobato.

"Tanba ne'e mak foin lalais Konsellu Administrasaun Fundu Infraestrutura (KAFI) halo ona reuniaun kona-ba maka estrada rotunda Nicolau Lobato ba to'o iha Tibar", tenik nia

"Foin ho Covid ne'e portu Tibar para tiha, suspende tiha, maibe agora sira kontinua fila-fali servisu, fó ona planu ida ba iha 2022 para hotu 2022", Nia hatutan

Tanba ne'e mak, kondisaun estrada rotunda Nicolau Lobato ba to'o Comoro ne'e tenke hotu.

"Ida-ne'e kestaun ho finansa, porque iha ekipa rua ou tolu iha- ne'ebá mak halo, ekipa finansa agora deskuti hela kestaun ida-ne'e la'o ba oin", nia hakotu. (*)