Ministru Prezidénsia Konsellu Ministru Fidelis Leite Magalhães, esplika projetu dekretu governu ne'e aprezenta husi Ministru Finansa, Rui Gomes no ohin hetan ona aprovasaun.

Dekretu governu ida- ne'e hatuur regra sira kona-ba ezekusaun Orsamentu Jerál Estadu nian ba tinan 2021, ne'ebé hetan aprovasaun husi lei númeru 14/2020 loron 29 fulan dezembru no aplika ba orsamentu sira ba òrgaun no servisu sira husi administrasaun sentrál, Rejiaun Administrativu Espesial Oecusse Ambeno (RAEOA) no seguransa sosiál.

Diploma ne'e, hakarak fó garantia ba efetivu no rigorozu kontrolu orsamentál no tempu hanesan, hodi simplifika prosedimentu sira ezekusaun orsamentál nian, ne'ebé fó kontinuidade ba mudansa sira-ne'ebé hahú ona iha tinan 2020, ho objetivu atu fasilita ezekusaun Orsamentu Jerál Estadu nian ba tinan 2021 husi órgaun no servisu sira setór públiku administrativu nian.

"Dahuluk Konsellu Ministru aprova projetu dekretu governu nian kona-ba ezekusaun Orsamentu Jeral Estadu nian ba tinan 2021", nia ko'alia hafoin reuniaun Konsellu Ministru extraordinariu iha Palásiu Gvernu, sesta (08/01).

Nia dehan, Lei OJE ba tinan 2021 tama ona, ne'ebé vigora iha loron 01 fulan-janeiru.

"Sistema sira komforme husi Ministru Finansa hato'o sistema sira prontu hotu, ne'ebé segunda sistema ezekusaun sira bele online hotu ona, no hahú ho prosesu finansa nian sira hotu ne'ebé mak presiza atu halo", tenik nia

Nia akresenta, iha lei ba Orsamentu Jerál Estadu, maibé ba implementasaun ne'e presiza iha dekretu. (*)