Xefe estadu hato’o lia hirak ne’e hafoin hasoru malu ho Prezidente Repúblika (PR) Francisco Gutrres Lú Olo iha Palásiu Prezidensiál, Bairru-pite ohin.
“Governu mak tenke fó servisu ba ita-nia joven sira, se lae ita bele dehan ita-nia joven sira ne’e sai marzinalizadu dala rua, prontu marzinalizadu iha nia rai rasik depois ba marzinaliza tán iha ema-nia rai,” Jenerál Lere informa ba jornalista sira, Kuarta (6/1).
Lere fó ezemplu, joven sira ba servisu iha ema-nia rai ne’e tanba de’it servisu laiha ne’e mak ba iha ema-nia rai, marzinaliza iha rain rasik ne’e mak ba servisu iha Austrália, maibé ba iha-ne’ebá marzinaliza tán.
“Mezmu sira marzinaliza iha ema-nia rai, maibé sira eroi, eroi ba dezenvolvimentu nasaun nian, sira haruka osan mai, foin lalais ha’u rona katak sira na’in 100-resin halai husi servisu fatin, ne’e problema ne’ebé dezafiu ba sira-nia situasaun, agora governu tenke rezolve tanba saida mak halai, kompañia mak la selu ka korona virus, entaun ne’e dezafiu boot ba ita-nia estadu no governu para onsá estabiliza ba ita-nia joven ka jerasaun sira-ne’e,” nia katak.
Jenerál fitun rua ne’e dehan, ita lakohi mak ita-nia joven sira marzinaliza ba dala- rua, iha rai rasik mós marzinaliza, depois marzinaliza mós iha ema rain.
“Ha’u la fiar katak sira- ne’ebé ba servisu iha Austrália no Korea ne’e hanesan ema Australianu ka Koreanu, maibé sira-nia moris la hanesan, sira sakrífika sira-nia aan, tanba ne’e sira mós sai eroi ba ita-nia dezenvolvimentu, sira-nia osan hira mak loron, fulan no tinan tama iha Timor, tanba ha’u la’o iha munisípiu sira haree katak uma barak mak luxu no di’ak, afinál sira mak halo, tanba ita teke agradese ba sira,” tenik Lere Anan.(*)