“Tilomar iha suku Lalawa, totál uma MDG hamutuk 318 hanesan ne'e maibé maioria uma ne'e la uza tanba katak laiha bee-moos, laiha ahi nomoos kondisaun balu maka la permite atu sira hela,” Administradór Postu Administrativu Tilomar, José Fátima Xavier ko’alia iha Cova Lima, kinta (31/12).
Administradór Postu Administradór Tilomar ne’e simu informasaun husi komunidade katak uma MDG ne'ebé hari'i ona ho distánsia la dook-malu, membru família ne'ebé barak liu, halo benefisiáriu sira labele hela tanba kondisaun uma ne'ebé kloot liu.
Caption : UmA MDG ne'ebe Governu hasai osan bo'ot hodi hari'i iha TL maibe tuir komunidade barak ba iha kualidade nune'e komunidade barak abandona
Nune’e mós uma hirak ne'e kondisaun hahú aat ba daudaun, odamatan no janela balu rahun ona tanba hetan estragu husi ema deskoñesidu.
Molok hari'i uma hirak ne'e, nia parte orienta benefisiáriu sira atu ba hela maibé komunidade balu mós hato'o lamentasaun lakohi hela iha área parte foho husi uma ne'ebé hari'i ba no komunidade balu prefere hela iha rai tetuk tanba sira iha ona kondisaun uma ne'ebé di'ak.
Nia esplika, kondisaun uma hirak ne'e rasik to'o oras ne'e kontinua abandona, balu grave uitoan, dala-barak nia relata ona parte kompetente atu haree maibé laiha resposta.
“Ha'u sempre koordena ho konsellu suku sira-ne'ebé pertense ba uma konstrui hato’o relatóriu ba Ministériu Solidariedade Sosiál no Ajénsia Dezenvolvimentu Nasionál (ADN) mai iha munisípiu mas rezultadu mak ohin loron hanesan ne'e,” hateten nia.
Populasaun iha postu Tilomar hamutuk 10.413 kompostu hosi suku 4 ne’ebé suku Biseuk iha aldeia 7, suku Lalawa iha aldeia 6, suku Maudemo iha aldeia 7 no suku Kasabauk iha aldeia 3.(*)