Xefe Bankada FRETILIN  konsidera deklarasaun ne’e nu’udár meius ida hodi fó presaun ba governu nune’e nia husu VIII governu atu tetu didi’ak molok hola desizaun ba tender fórnese mina ba sentral EDTL Hera 2021 nian ne’e. 

"Se iha ona desizaun ba kompania ida ne'ebe nia kompromisiu ho estadu seidauk kompleta no seida’uk hatama hotu Mina ba Sentral EDTL  tuir kontratu fórnese Kombustivel 2020, ha’u hanoin ida ne'e desizaun ida ke ita presiza kestiona. Ita presiza kestiona tanba, se kompania fórnesedor ida ne'ebe manan tiha ona kontratu seidauk kompleta nia fórnesimentu ba estadu, eh agora desizaun atu fó nia manan kontratu foun, sem haree ba kontratu ida anterior la kompleta, ne'e hau hanoin laloos", Xefe Bankada FRETILIN hateten iha Parlamentu Nasionál.

Deputadu parlamentu Nasional ne’e komenta ba deklarasaun husi SACOM Energia Lda, ne’ebe dehan ho bo’a fe propoin atu mina restu sei hatama hamutuk ho mina ro bo’ot ida ne’ebe sei lori kombustivel mai EDTL Hera iha Janeiru 2021, ne’e hatudu hahalok monopóliu ba forenesimentu mina ba EDTL.

"Deklarasaun antisipada hanesan ne'e, iha konotasaun katak, nia monopoliu ona fórnesimentu kombustivel Hera, tanba se rezultadu se’idauk sai, kompania fórnesidor bele garante ona katak nia parese sei manan, e se manan ho defisencia hanesan ha’u hatete dadauk katak sei falta kompleta 2 milloes litrus ba fórnese, eh kompania rasik garante hela katak nia sei manan, ne'e konotasaun hatudu katak, monopoli fórnesimentu sentral eletrika Hera", Branco hateten.

Entretantu to’o ohin SACOM Enerjia Lda ho nia parseiru Trafigura Pte, Ltd seida’uk hatama mina ba EDTL Betanu ho balansu totál 2, 053,629.67 litru.

Antes ne’e Abilio Araujo deklara nia kompania kualifikadu ona atu manan tender fórnesimentu mina ba EDTL Hera 2021 nian, hodi nune’e sei hatama hamutuk mos mina restu ne’ebe seida’uk fórnese ba Sentral EDTL Betanu tuir kontratu fórnesimentu kombustivel ba EDTL Betanu 2020.

“SACOM Enerjia propoe atu hatama iha Janeiro ro bo'ot ida lori mina mai Hera (tamba SACOM kualifikado hodi manan tender ba tinan oin) no sei lori hamutuk restu ne'be sei falta ba Betano,” dehan Prezidente konsellu Administrasaun Kompania SACOM Energia Lda, Abilio da Conceicao Abrantes de Araujo ba www.tempotimor.com fóin lalais ne’e via Whatsapp. (*)