Tuir konstituisaun RDTL artigu 88 parte c katak, PR iha prazu loron tolunulu nia laran, hahú hosi simu diploma naran ida husi Parlamentu Nasionál atu promulga hanesan lei, Prezidente-Repúblika bele promulga eh uza direitu vetu nian, hodi husu apresiasaun foun kona-ba lia-tatoli ne’e ho fundamentu; maibé desizaun PR Lú Olo foti ba OJE 2021 nian iha de'it loron 14 nia laran.

"Prezidente Repúblika, Francisco Guterres Lú Olo, ohin, loron 28 fulan-dezembru tinan 2020, promulga ona Dekretu Parlamentu Nasionál númeru 26/V Orsamentu Jerál Estadu ba tinan 2021," dehan iha komunikadu imprensa ne'ebé www.tempotimor.com asesu husi Palásiu Prezidensiál bairru-pite, Segunda (28/12).

Iha komunikadu ne'e mós dehan, OJE ba tinan 2021 nian hamosu alterasaun metodolójika balu ne'ebé halo indikasaun kona-ba despeza sira tuir programa ida-idak nian, alendé utiliza klasifikasaun orgánika no klasifikasaun ekonómika.

"OJE 2021 hamosu previzaun orsamentál ba órgaun no servisu sira iha Seitór Públiku Administrativu, kompostu hosi Orsamentu Administrasaun Sentrál, hosi Orsamentu Rejiaun Administrativa Espesiál Oe-Kusse Ambenu no hosi Orsamentu Seguransa Sosiál nian," katak iha komunikadu.

"Durante tinan 2021, governu hetan autorizasaun atu realiza transferénsia hosi Fundu Petrolíferu to'o montante tokon $1.377,6," sita iha komunikadu refere.

Entretantu PN aprova Dekretu númeru 26/V Orsamentu Jerál Estadu ba tinan 2021, ho votu a favór 44, laiha votu kontra no abstensaun ne'e iha loron 12 Dezembru 2020. Nune'e iha loron 14 submete kedas ba Prezidente Repúblika ne'ebé ohin kompleta loron 14 xefe estadu promulga kedas ona.(*)