Sekretáriu Estadu Kooperativas (SEKoop), Elizário Ferreira hateten, kooperativa ninia pilár importante maka edukasaun, katak atu dezenvolve kooperativa ida, presíja hahú ho edukasaun, dezenvolve ho edukasaun, kontrola ho edukasaun no dependénsia totalmente ho edukasaun.
Tuir nia, atu asegura governasaun di'ak ba instituisaun hanesan sekretária estadu kooperativa, presíja governasaun ida di'ak liuhusi halo auditória.
"Sé ida la hatene, fó hanoin nia atu halo hodi nia bele hatene. Nia la komprende, hatudu dalan ba nia atu komprende, tanba ida ne'e, formasaun ne'e importante teb-tebes iha vída instituisaun ninian", Elizário Ferreira hateten durante diskursu abertura ba formasaun iha salaun Luz Clarita Akait, Tersa (22/12).
Nia dehan, auditória interna la signifika atu kondena malu, maibé atu fó hanoin ba malu iha ne'ebé hanaran auditória interna komprensívu hodi kontrola servisu sira ne'ebé internalmente la'o iha instituisaun ida.
Iha fatin hanesan, Inspetór Gabinete ba Inspesaun no Auditória iha SEKoop, Henrique Oliveira Ximenes ne'ebé organiza formasaun ne'e esplika, objetivu husi formasaun ne'e atu halo ba kargu direjente sira, funsionáriu públika sira atu eleva sira nia koñesimentu atu bele inteira didi'ak kona-ba saida mak inspesaun no oinsá sira bele hatene halo auditória interna.
"Inspesaun ne'e mak saida, kontrolu internu ne'e mak saida, kona-ba auditória interna ne'e mak saida, hodi nune'e maka hala'o formasaun ida ne'e atu eleva kapasidade funsionáriu públiku nian, nu'udár servidór-du-estadu ho governu", nia dehan.
Nia informa, tuir planu parte gabinete inspesaun no auditória iha SEKoop, sei kontinua buka meius hodi hasa'e funsionáriu sira nia kapasidade liu-liu oinsá maka sira atu bele tuir formasaunespesifiku liutan iha área inspesaun, kontrolu internu, no auditória nian.
"Atu sira atu bele hetan mós kapasidade mais viável para hodi nune'e para futuru timor nian sira bele hala'o auditória mais aprópriadu ba iha kooperativa nian", nia hateten.
Partisipante ne'ebé tuir formasaun, hamutuk ema na'in 37 ne'ebé mai husi munisípiu sanulu-resin-rua (12) no Rejiaun Administrativa Espesiál Oekussi Ambeno (RAEOA), ho durasaun tempu durante loron-rua 22 to'o 23 Dezembru 2020.(*)