Projetu tolu rezolusaun governu nian ne'e, aprezenta husi Ministru Administrasaun Estatál (MAE), Miguel Pereira de Carvalho no ohin hetan duni ona husi Konsellu Ministru.
Ministru Prezidensia Konsellu Ministru, Fidelis Leite Magalhaes hateten, Prezidente Autoridade ne'ebe nomeia fali ba Munisipiu Baukau mak Olivio Freitas, administrador foun ba Munisipiu Lautem Domingos Savio no Munisipiu Vikeke Januario Soares, mandatu ba tinan lima.
"Ohin ho nomeasaun ba sira na'in tolu ne'e, mandatu ba tinan 5, iha tempu hanesan ezonera sira na'in tolu seluk ne'ebe mak ezerse hela funsaun liu-husi substituisaun ba knaar durante halo iha tinan hirak nia laran, ne'ebe ezonera sira ne'ebe kaer hela kargu no nomeasaun foun ba sira na'in tolu", Fidelis hateten lia hirak ne’e hafoin reuniaun Konsellu Ministru iha palasiu Governu, segunda (21/12).
Nia mos dehan, iha rezolusaun ne'e fó mos knaar ba Ministru Administrasaun Estatál, Miguel Perreira de Carvalho ho nia ekipa atu prepara ba tomada de pose.
"Espera katak, iha tempu badak sei halo tomada de pose ba sira na'in tolu ne'ebe mak hetan ona nomeasaun Konsellu Ministru, ne'e parte husi MAE nian mak halo aranju sira hotu ne'ebe mak nesesariu ba iha tomada de pose", nia dehan.
Antes ne'e Prezidente Autoridade Munisipiu Baukau, mak Antonio Guerres, administrador Munisipiu Lautem, Jeferino Siqueira, no Munisipiu Vikeke, Gregório Henrique. (*)