Tempotimor (Dili)- Eis-Prezidente Autoridade Reziaun Administrativu Espesial Oekusi Ambenu (RAEOA), Mari Alkatiri husu CNRT labele haluha kestiona kazu kompana Light House ne'ebe lori Timor Leste ba tribunal iha Melbourne hodi husu indimenizasaun.
Tuir Marik kompana Light house lori Timor Leste ba Tribunal hodi husu Timor Leste selu indemizasaun ho osan besik Dollar bilaun no mos nia kestiona razaun partidu CNRT la husu mos kona ba osan adisional ba Aeroportu Suai, maibe kestiona de'it mak osan adisional ba konstrusaun Ro Haksolok.
"Husu ba sira (CNRT) be Light House iha Melbourne be, ita be selu $1.500 miloeins, ne'e merese, ga la merese? Se 650 miloeins de dolar ke hasai husi fundu minarai para sosa besi tua iha tasi laran, ne'e merese ka la merese", Mari lekar sai hafoin hatama keixa ida ba Ministeriu Publiku iha edifisiu prokurador Jeral Kolmera, sesta (18/12).
"Seidauk iha ema ida dehan katak atu fo $14 milloes ba ema seluk, osan tau iha orsamentu de estadu, so foti kuandu ho dalan ida ke justu, hau nunka dehan, hau konkorda atu fo $14 milloes ba empreza ne'e, hau nunka dehan, tanba saida sira foti problema, foti problema, foti problema", Nia afirma
Sekretariu jeral Partidu FRETILIN ne'e ho fiar a'an kestiona paraderu osan adisionais ba projeitu barbarak durante CNRT nia governasaun iha tinan sanolu kotuk.
"Osan be barbarak ba adisionais ba projeitu barbarak iha ne'ene, hotu-hotu ho adisionais. E adisionais advez 100 pursentu tan. Ne'e la ko'alia. Aero Portu Suai ne'e adisional dala hira ona? Seida'uk hotu tan. Agora dehan atu hakarak adisionais hotu," Mari so'e piadas.
Maske nune'e nia mos rekuinese, nia parte la'os ona Prezidente RAEOA, nune'e la komenta ona kona-ba prosesu konstrusaun Ro Haksolok.
"Hau la'os ona Prezidente Oekusi, sira husu ajuda, hau ajuda, dezde PA (Prezidente Autoridade RAEOA) ba ne'e, hau nunka ba Oekusi, uma ZEEMS nian mos hau la tama, hau kuandu sai ne'e, sai ona", Nia informa
Antes ne'e, bankada CNRT kestiona orsamentu adisional $14 milloes ne'ebe governu tau ba Ro Haksolok, tanba konsidera kompania Atlantic Eagle bankrut no prosesu ne'e iha hela Ministeriu Publiku. (*)