Ministru Adminitrasaun Estatál Miguel Perreira de Carvalho hateten, governu planeia ona katak, iha 2021 nia laran, governu sei harii uma ba kbiit la’ek sira iha teritóriu Timor-Leste laran tomak, ne’ebé espesiál ba munisípiu Baukau hamutuk 177.

“Kona-ba uma ba kbiit laek sira, MAE ko’alia ona katak atu halo uma ba kbiit laek sira iha TL tomak ho totál rihun 1.772. Entaun, atu hatete de’it katak, iha tinan oin, bazeia ba aprovasaun OJE 2021 nian, maka iha Baukau ita sei halo uma ba kbiit la’ek hamutuk 177, iha postu neen munisípiu Baukau, ho totál orsamentu besik tokon $3.2,” Ministru Miguel hateten lia hirak ne’e liuhusi nia intervensaun ba xefe suku sira iha diálogu PR Lú Olo nian iha Baukau, Kinta (17/12).

Nia afirma, uma ba kbiit laek sira ne’ebé atu harii, nia médida sei la hanesan.

“Uma balun iha médida 38 metru kuadradu, 42 metru kuadradu, ne’ebé uma ida nia folin entre rihun $14 to’o $16, ne’ebé destinadu ba ema kbiit laek sira iha suku hotu-hotu iha TL laran tomak,” nia dehan.

Infelizmente tanba kapasidade osan la to’o, maka kada suku ida só halo iha aldeia ida uma tolu de’it, depois tinan tuir mai kontinua no ba aldeia sira sleuk.

Ministru mós apelu ba lider lokál sira katak, ema ne’ebé merese hodi sai benefisiáriu ba uma ne’e mak, ema sira ne’bé kbiit laek duni, labele familia ka grupu fali mak benifísia, tanba ne’e iha métodu para hodi identifika ema kbiit laek sira.(*)