SEPS Joaquim Gusmao hateten, Primeiru Ministru husu hela SEPS ninia preparasaun atu hasoru situasaun ne'ebé karik mosu udan boot, mosu risku ba Timor-Leste hodi responde lalais ho diak.
"Fo orientasaun balun liu-liu preparasaun Sekretariu Estadu Protesaun Sivil nian ne’ebé Timor-Leste sei hasoru klimátika ho fenómena udan ne'ebé tau ho volume boot", Joaquim hateten lia hirak ne’e hafoin hasoru-malu ho Primeiru Ministru Taur Matan Ruak iha palasiu Governu, Kinta (17/12).
Nia dehan, preparasaun ne'e halo mós koordenasaun ho Ministériu sira seluk, liu-liu ho Ministériu Administrasaun Estatál (MAE) atu hasoru, karik mosu dezastre boot ruma.
"Ita preparadu, hamutuk ho instituisaun sira seluk, parseiru sira halo ona reuniaun prepara atu bele aprende husi ita nia akontesimentu fulan hirak liu-ba, inundasaun boot iha ita nia rai laran, ita prepara atu bele hasoru", nia haktuir.
Nia mos fó hanoin katak, foin lalais ne’e iha loron 8 fulan dezezembru, akontese inundasaun iha Kovalima, SEPS oferese kedan apoiu emerjénsia.
"Apoiu emerjensia ba fatin balun ne'ebé bee sobu uma, ita mós atende ho materiál protesaun atu bele hadi'a fali sira nia uma, no ita update nafatin ho situasaun agora akontese iha ita nia rai laran", nia dehan. (*)