Angelina ko’alia ne'e tanba nia hare katak, governu mak iha koñesimentu kle’an ba sira ninia difikuldade iha ezekusaun OJE durante fulan rua nia laran.
Ne'e duni nia haktuir, Bainhira Governu hare sistema ezekusaun taka iha loron 15 novembru mak sei iha dezafiu ba ezekusaun OJE tinan 2020, entaun nesesáriu atu governu aprezenta ba PN.
"Ha’u hanoin ida ne'e razaun tékniku En termus ezekusaun atu rigorozu iha lei, se ida ne'e kabe ba kompeténsia PN nian, se diak liu Governu lori mai PN, tanba Governu mak hatene diak ninia difikuldade sira iha ezukusaun OJE durante fulan rua. Bazeia ba sistema, tenke to’o dia 15 novembru taka, se ida ne'e difikuldade ba governu, Governu tenke aprezenta mai Parlamentu, atu nune'e Prlamentu mak bele halo alterasaun," Angelina hateten iha PN, Kinta (17/12).
Molok ne'e, Governu liuhusi Reuniaun Konsellu Ministru iha Kuarta (16/12), konsege aprova ona projetu dekretu governu nian kona-ba alterasaun dahuluk ba dekretu governu numeru 14/2020, loron 23 fulan-outubru, kona-ba ezekusaun Orsamentu Jeral Estadu tinan 2020 nian, ho alterasaun ida-ne'e, FCP sei bele lansa iha SIGF to'o iha loron 17 fulan-dezembru tinan 2020.
Ministru Prezidénsia Konsellu Ministru, Fidelis Manuel Leite Magalhães deklara, sistema ezekusaun Orsamentu Jerál Estadu ba tinan 2020 nian loloos taka ona iha loron 10 fulan dezezembru, maibé seidauk taka, tanba hakarak fasilita ezekusaun ne'ebé diak liu. (*)