Ministru Justisa (MJ), Manuel Cárceres da Costa hateten, ezekusaun OJE 2020 nian, Ministériu ne’e uza ba pagamentu saláriu funsionáriu sira nian iha fulan dezembru liu to’o ona 100%, maibé orsamentu ne'e rasik la to'o no sei husu tan osan adisional ba iha Ministériu Finansas (MF).
"Apa, ami atu debe tan ona. Ami to'o ona pursentu 97, selu tan sira nia saláriu dezembru ho desimu terseiru mós ami to’o ona pursentu 100, ne'ebé ami husu tan osan husi finansas", Ministru Justisa (MJ), Manuel Cárceres da Costa hateten lia hirak ne’e, hafoin asina akordu ho Ministra Saúde Odete Freitas Belo (MS) iha nia kna'ar fatin, Kuarta (16/12).
Governante ne’e dehan, maski ezekusaun ne'e atinje ona 97%, maibé orsamentu ne'e rasik nafatin la to'o.
Nia mós informa, prosesu ezekusaun OJE 2020 nian la’o normal nafatin ba periúdu fulan tolu nian, tanba Ministériu Justisa komu laiha projetu, hotu-hotu barak liu ba iha bens no servisu, maibé iha projetu ida de'it, iha edifísiu defensoria públika nian iha Gleno.
"Projetu mak ida ne'e de'it de restu selu tusan, retensaun Sistema Nacional Cadastro (SNC) nian, retensaun ba morru ne'ebé uluk sira halo iha prizaun Gleno, selu hotu ona, ministériu la debe ona, ba oin la’e, la'o de'it", nia hateten.(*)
