Ministru Asuntu Veteranus no Kombatentes Libertasaun Nasionál (MAVKLN) Julio Sarmento "Meta Mali" katak, hasoru malu ho Prezidente Repúblika (PR) kona-ba oinsa atu komemora loron 31 Dezembru iha tinan 2020 nian.
"Loron importante ida ne'e, iha sasan balun ne'ebé Prezidente Repúblika (PR) Francisco Guterres Lú Olo mak tenke ko'alia, entaun ha'u ho ha'u-nia Sekretáriu Estadu Gil da Costa "Oan Soru" mai konsulta ho PR, para konkorda no serimónia ne'e halo iha ne'ebé," Ministru Meta Mali hateten iha Palásiu Prezidensiál bairru-pite, Tersa (15/12).
Nia mós afirma, iha buat balun ne'ebé Konsellu Ministru (KM) bele deside, maibé sei aprezenta ba PR, maibé iha buat balun PR mak tenke deside.
Entretantu Prezidente Nicolau dos Reis Lobato (Tafui) moris iha loron 24 fulan-Maiu 1946, iha Sasatan Oan, Aitara-Hun, Soibada, Postu Administrativu Laclúbar, Administrasaun Manatutu no mate iha loron 31 fulan-Dezembru 1978.
Saudozu hetan tiru no mate ho kilat iha liman, iha Mindelo, entre Maubessí, Turiscai no Manufahi. Indonézia konsidera saudozu nia mate hanesan troféu ida ba sira hodi hametin liután sira-nia otimizmu katak integrasaun loos ona no funu remata ona. Bainhira nia mate, saudozu Nicolau Lobato kaer kargu nu'udar Prezidente FRETILIN, Prezidente RDTL no Comandante em chefe das FALINTIL.
Saudozu Nicolau simboliza erói sira hotu ne'ebé sakrifika sira-nia moris ba ita-nia kauza nasionál, hamriik nu'udar povu ho identidade rasik, hamriik nu'udar nasaun independente no soberana.
Saudozu Nicolau nu'udar oan mane boot husi mestre-katekista Narciso Manuel Lobato ne'ebé moris iha Leorema, Postu Administrativu Bazartete, Administrasaun Liquiça no Felismina Alves Lobato ne'ebé moris iha Macadiqui, Postu Administrativu Uatulari, Administrasaun Viqueque.
Saudozu Nicolau Lobato hamutuk ho nia alin sira na'in 13 no husi família boot ne'e, Rogério Lobato de'it mak sei moris hela. Enkuantu saudozu Nicolau Lobato ho nia alin no nia feton sira seluk mate hotu durante luta hasoru invázor Indonézia, exeptu Silvestre mak fila uluk ba mundu seluk molok Indonézia nia invazaun.
Saudozu Nicolau nia aman mate iha Leorema, iha loron 26 fulan-Abril 1976 tanba moras no ninia inan mate iha foho Maubere, Laclúbar iha fulan-Jullu 1979 tanba ema mak oho.
Saudozu nia liafuan ne'ebé ita hotu presiza halo refleksaun mak "Ita-nia país kiik no fraku. Ita iha inimigu barak ho kbiit makaas. Maibé ita hatene katak ita bele no ita tenke manan".
Tinan 41 liubá kotuk, saudozu Nicolau Lobato oferese nia moris tomak hodi kumpri ninia palavra de ordem "A última bala é a minha vitória". Iha 31 Dezembru 2020 sei komemora loron ba erói nasionál no aniversáriu ba saudozu Nicolau Lobato nia mate. (*)
