Olinda rasik so’e piadas ba deputadu sira husi bankada CNRT relasiona ho auzénsia durante diskusaun no aprovasaun Orsamentu Jerál Estadu (OJE) tinan 2021 ne'ebé remata iha Sábadu (12/12).
"Agradese bo'ot ba na’in hira ohin tama fali mai, kontenti. Orsamentu liu tiha ona, hanesan demokrasia mak hanesan ne'e, tenki mai fali prienxe ita bo'ot sira nia fatin atu nune'e kompleta malu," Olinda Guterres hateten iha plenária Parlamentu Nasional Dili, Tersa (15/12).
Hatan ba piadas husi Olinda, Deputada bankada CNRT, Maria Câmara Bisoi husu atu Olinda lalika senti kontenti ho prezensa bankada CNRT iha plenária Parlamentu Nasional nian tanba Bisoi konsidera Olinda la’ós husi partidu CNRT, nune'e desizaun tomak bankada nian husi partidu idadidak nian.
"Deputada lalika kontenti ho ami, lalika ezije dehan katak provínse ba ami, Parlamentu la’ós ita bo'ot nian, mai husi ita bo'ot nia uma, ami la’o mai husi ita bo'ot nia partidu," Deputada CNRT, Maria Câmara Bisoi hateten.
Tuir observasaun www.tempotimor.com iha PN nota katak, deputadu bankada CNRT rasik marka hikas prezensa iha plenaria ohin nian hafoin deside lakohi partisipa iha debate no aprovasaun OJE 2021.(*)