Tuir nia, kazu sira ne'ebé rejistu ne'e, kuaze 13 de'it mak estadu sai autór, maibé restante ne'e ema bai-bain mak lori estadu ba tribunál.

"Servisu kontensiozu liu-liu iha matéria ne'ebé estadu hanesan vítima, estadu hanesan autór no estadu hanesan reu. Prosesu ne'ebé agora iha hela tribunál estadu hanesan reu iha kazu 88, maibé iha 13 kazu de'it mak estadu hanesan autór," PJR José da Costa Ximenes hateten ba jornalista iha Palásiu Prezidensiál Bairru-pite, Segunda (14/12).

PJR esplika, husi kazu sira ne'e barak liu mak ema halo asaun kontra estadu liu-liu ba Terras no Propriedades.

"Kazu kona-ba Terras no Propriedades, kazu kona-ba text hanesan Connocophilips no empreza sira seluk halo asaun kontra estadu, ne’ebé MP mak defende interese estadu nian, entaun atu dehan saida, problema ida ne'ebé nia fundamentál liu iha Timor mak sira ne'ebé iha terenu, ita iha ona Sekretáriu Estadu no Diretór bar-barak, maibé ita-nia problema barak iha ne'e. Balun mós halo falsifikasaun katak ida ne'e mak na'in, maibé aban mosu ida seluk dehan na'in mak ida ne'ebá, entaun ha'u preokupa mós mak iha kestaun Terras no Propriedades," ni preokupa.

PJR afirma liu tan, uluk ema book iha Tasi-Tolu, agora para, iha mota laran mós ema sukat hotu, foho leten mós ema ba sukat hotu.

"Ita-boot sira hakarak hatene, estadu kuaze laiha rai, ema privadu mak kuaze atu domina rai, entaun aviza boot ida ba Ministériu Justisa (MJ) no Sekretáriu Estadu Terras no Propriedades (SETP), depois sentru ba konflitu mak sira ne'ebé iha terenu," nia hateten.

Antes ne’e, wainhira mosu polimika rai iha kasait, Ministru Justisa (MJ) Manuel Cárceres promete hakarak atu sobu mafia justisa, liu-liu iha parte teras no propriedade iha nasaun ne’e maibé to’o oras nee iis laiha.(*)