Liu husi pontu de ordem, Olinda husu Prezidenti Parlamentu Nasional (PPN) atu esplika rezimentu ne'ebé mak fó dalan hodi bankada CNRT la partisipa debate OJE.
Olinda, senti la haksolok tanba deputadu lakompletu iha debate OJE 2021 nian, tuir Olinda povu hili deputadu sira atu hato'o aspirasaun no problema povu nia ba governu liu husi Parlamentu Nasional.
"Horseik loloos ha’u ko’alia maibé la konsege. Ohin ha’u tenki hasai duni, hakarak ka lakohi hasai duni, tanba mai asina tiha depois fila, ida ne'e ladun diak," Olinda hateten iha PN Dili, Kinta (10/12).
Atual Prezidenti bankada KHUNTO hatutan, nia senti triste tebes tanba konsidera povu nia votus hili reprezentante iha PN atu debate povu nia moris maibé realidade deputadu 21 husi Bankada CNRT asina hela deit lista prejensa pois fila seim partisipa iha plenaria.
"Ohin ba loron hat (4), Primeiru Ministru, Prezidenti Parlamentu Nasionál, kolega sira hotu saida mak ita boot sira hare, pelumenus ita bo'ot fó netik esplikasaun ruma mai, iha artigu ruma, rejimentu mak fó ou la fó dalan," Olinda dehan.
Iha fatin hanesan, PPN Aniceto Guterres hateten deputadu iha poder no dever, bainhira deputadu ida ezerse nia poder entaun presija mós ezerse nia dever.
"Iha rezimentu iha hotu, politikamente sira justifika ona ho sira nia deklarasaun, maibé intermus rezimentais ita iha komisaun etika ne'ebé bele hare kestaun ida ne'e, maibé laos ohin, sei hare momentu sertu, propeiu atu hare ida ne'e tuir mekanismu orgaun-orgaun kompetente iha parlamentu atu hare kestaun sira rezimentu," Aniceto hateten.
Antes ne'e liu husi deklarasaun bankada CNRT liu husi Deputadu Patriocino Fernandes hateten, CNRT deside lakohi partisipa iha debate espesialidade OJE 2021 tanba konsidera OJE 2021 inkonstitusional. (*)