Print this page

PR Lú Olo Sei Atribui Prémiu Direitu Umanu ba Vensedór Na'in-Lima

By December 10, 2020 1718
Pampletu Prémiu Direitus Umanus “Sergio Vieira de Mello” Pampletu Prémiu Direitus Umanus “Sergio Vieira de Mello” Foto Espesial

Tempotimor (Dili)-Prezidente Repúblika, Francisco Guterres Lú Olo, ohin, sei atribui Prémiu Direitus Umanus “Sergio Vieira de Mello” ba edisaun-13 ba mellor klasifikadu na'in lima, ne'ebé iha tinan barak nia laran, hatudu husi ezemplu serbisu hodi defende, promove no divulga direitus umanus iha Timor-Leste.

"Liuhusi Dekretu PR númeru 71/2020, 10 dezembru, Xefe Estadu sei atribui Prémiu Direitus Umanus “Sergio Vieira de Mello” ba manán-na’in ho kategória Direitus Sosiais, Ekonómikus no Kulturais ba Cosme dos Santos Freitas, Pe. Martin António Pablo Abad Santos, S.J, Deolindo da Costa no Leopoldina Joana Guterres. Manan-na’in ba kategoria Direitus Sivis no Polítikus mak FOKUPERS," Komunikadu imprensa ne'ebé www.tempotimor.com asesu husi Palásiu Prezidensiál, Kinta (10/12).

Iha komunikadu ne'e mós dehan, kada tinan iha loron adosaun Deklarasaun Universál Direitus Umanus iha Asembleia Jerál Organizasoins Nasoins Unidas, ne’ebé koñesidu nu’udar loron Internasionál ba Direitus Umanus, mak 10 dezembru, PR atribui Prémiu Direitus Umanus “Sergio Vieira de Mello” ba sidadaun no organizasaun ne’ebé promove, defende no divulga direitus umanus iha Timor-Leste.

Anualmente, PR loke oportunidade ba sidadaun timoroan no estranjeiru husi organizasaun governamentais no la’ós governamentais atu hatama sira-nia kandidatura ba Prémiu Direitus Umanus “Sergio Vieira de Mello” tuir kritériu sira ne’ebé estabese. Hafoin Conselho de Agraciamentos e Ordens Honoríficas halo análize, apresiasaun no vizitas ba fatin implementasaun atividade husi kandidatu sira, orgaun konsultiva ne’e sei hato’o ba PR atu deside manán-na’in ba Prémiu.

"Prémiu Direitus Umanus “Sergio Vieira de Mello” harii ho Dekretu-Lei númeru 15/2009, 18 marsu, atu rekoñese no destaka atividade sidadaun timoroan no estranjeiru, husi organizasaun governamentais no la’ós governamentais, ba promosaun, defeza no divulgasaun Direitus Umanus iha TL, nune'e kada manán-na’in sei hetan prémiu ho valór osan US $ 10.000," sita iha komunikadu.

Prémiu Direitus Umanus hahú iha tinan-2008, liuhusi inisiativa Prezidente Repúblika, Laureadu Nobél da Páz, Ramos Horta atribui ba sidadaun ka organizasaun governamentál ka la’ós governamentál, husi Timor-Leste ka husi estranjeiru hodi promove, defende no divulga direitus umanus iha TL.(*)

Rate this item
(0 votes)
Last modified on Thursday, 10 December 2020 14:17
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items