Print this page

Deskonfia Komete Irregularidade, MUTL Husu PM Taur “Ezonera” SEFOPE

By December 09, 2020 5997
Portavoz sira husi Movimentu Universitáriu Timor-Leste (MUTL) halo hela konferénsia imprensa iha Kampus UNTL ohin (9/12). Portavoz sira husi Movimentu Universitáriu Timor-Leste (MUTL) halo hela konferénsia imprensa iha Kampus UNTL ohin (9/12). Foto Tempo Timor

Tempotimor (Dili)- Diskonfia Sekretáriu Estadu Formasaun Profesionál no Empregu (SEFOPE) Alarico do Rosário ho nia Diretór sira halo iregularidade hodi kansela timoroan na'in 15 ba servisu iha Austrália, maka Movimentu Universitáriu Timor-Leste (MUTL), ezije ba Primeiru Ministru (PM) Taur Matan Ruak atu ezonera Alarico do Rosário husi kargu SEFOPE.

Portavoz MUTL Ahoda Andrade, hateten problema kanselamentu ba traballadór timoroan na'in 15 ne'ebé atu ba servisu iha Australia, maka MUTL husu ba orgaun kompetente atu toma medida urjente.

"Ami husu ba PM Taur Matan Ruak atu ezonera tiha Sekretáriu Estadu ho Diretór no assesór SEFOPE nian ne’ebe mak laiha kapasidade atu lidera knaar tanba bele fó implikasaun ba ezekusaun Orsamentu Jerál Estadu (OJE)," Portavoz MUTL hateten liuhusi konferénsia imprensa iha kampus UNTL, Kuarta (9/12).

MUTL mós husu ba Parlamentu Nasionál no instituisaun kombate krime no korrupsaun atu aktu SEFOPE nian ho imediatu.

"PN, KAK no PDHJ tenki toma medida ho urjente ba kazu ne’e ho imediata, tenki halo investigasaun ida kle'an ba kazu ne’e tuir lei númeru 7/2020 kona-ba Medida Prevensaun Kombate Korupsaun (MPKK)," nia dehan.
MUTL mós ejize ba SEFOPE Alarico do Rosário atu rezolve lalais problema ne'e inklui labele hamosu injustisa ba joven sira iha Timor-Leste.

"Ami husu ba Sekretáriu Estadu Formasaun Profesionál no Empregu (SEFOPE) Alarico do Rosario atu uza ita-boot nia profesionálizmu hodi rezolve lalais problema ne’e ho imediatu no trata joven sira ho kondisaun hanesan sein diskriminasaun ruma," nia husu.

Bainhira, ejizensia MUTL nian mak la tau konsiderasaun ho imediata, maka MUTL komprometidu sei organiza foinsa’e tomak iha TL hodi hamri’ik halo asaun pasifiku hasoru SEFOPE iha loron hirak tuir mai.

Iha fatin hanesan, Joselino Pereira hateten katak, bainhira to'o Segunda (14/12) mak SEFOPE la fó resposta, maka MUTL sei hamriik ho foinsa'e hotu iha TL hodi halo asaun pasífiku hasoru SEFOPE.

"Ohin ami halo konferénsia imprensa alerta ba públiku, ami hein to'o segunda mak Alarico do Rosário laiha fó resposta ba ami-nia ejizensia ne'e ho imediatu, mak ami sei mobiliza joven hotu iha TL hodi halo asaun pasífika hasoru nia," Joselino hateten.

Nia mós dehan, MUTL sei hamutuk timoroan na'in 15 hodi luta kontra SEFOPE sira timoroan sira ne'e hetan vitória, tanba aktu SEFOPE nian ne'e halo diskriminasaun ba timoroan sira no hamosu injustisa ba joven sira, nune'e kontinua mosu problema ema ema dehan, joven mak sai autór ba krime no seluk tan.(*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items