Eis deputadu PN husi bankada PSD ne’e deklara fila ona ba FRETILIN tanba hakarak lori Mari Alkatiri Fila ba ukun nasaun, tanba nia haree katak, durante ne’e la hare dezenvolvimentu iha rai r ne’e, liuliu ukun nain sira la hadia povu nia moris.

“Ne’e maka ha’u fila mai FRETILIN hodi lori Alkatiri ba ukun hodi halo dezenvoilvimentu ba rai ida ne’e. La’ós tama partidu por tama deit. La’ós nar-naran to’o mai dehan maun boot ida ne’ebá be ha’u tuir nia. Ou maun boot ida ne’e hau tuir nia. La’ós ida ne’e. Problema agora la’ós problema maun boot, maibé problema agora problema dezenvolvimentu ba rai ida ne’e. Problema agora ne’e problema ba povu ninia moris”,Tara hateten lia hirak ne’e iha semináriu komemorasaun loron invazaun 7 dezembru ne’ebé hala’o iha CCF Komoro, Díli, Segunda (7/12).

Tara mós halo komparasaun hodi so’e piadas ba nia eis komandante em xefe Kay Rala Xanana Gusmão dehan, governasaun AMP ne’ebé kaer ukun tinan sanulu ho mehi bo’ot hodi fakar osan ba tasi.

“Ikus mai ne’e saida maka ha’u hare, tinan sanulu resin tau osan billaun ba billaun mas fizikamente ita la hare buat ida,” Tara dehan.

Tara mós gaba Mari Alkatiri ne’ebé jere osan estadu hodi halo dezenvolvimentu iha Oekusi durante tinan haat, konsege halo buat barak no Oekusi sai nabilan.

“Ha’u estuda, ha’u hare kuandu Mari ba ka’er iha Oekusi. Tinan rua ho balun ka tinan tolu Oekusi nabilan. Oras ne’e maka Mari sei nafatin karik, ha’u hanoin estrada ba iha foho sira ne’e ba tiha ona,” nia hateten.

Nia sei luta makaas atu lori hikas FRETILIN ba ukun nasaun ne’e hodi halo dezenvolvimentu hanesan uluk iha Tempu okupasaun eis governadór matebian Mário Carrascalão halo ba rai ida ne’e.

“Ba ha’u, halo oinsá mak FRETILIN ba fali ukun. Uluk ha’u tuir Mário Carrascalão tanba, iha ai laran rona Mário Carrascalão halo buat barak iha Timor-Leste. Ne’e mak ha’u tuir nia para halo dezenvolvimentu tanba nia halo jestaun di’ak ba rai ida ne’e”, Tara halo komparasaun. (*)