“Ha’u nia hare vingansa politika mak la’o iha ita nia rain ne’e. Kuandu ita rai hela vingansa polítika, ita sei rai hela kultura a’at ida ba ita nia joven sira. Ne’e Kultura a’at ne’ebé ita rai hela ba ita nia jerasaun foun”, Tara fó sai apelau ne’e iha semináriu komemorasaun loron invazaun 7 dezembru ne’ebé hala’o iha CCF Komoro, Díli, Segunda (7/12).
Nia dehan, la kusta bu’at ida bainhira matenek na’in sira tuur hamutuk atu tetu kona-ba sistema ukun ne’ebé di’ak ba nasaun, saida maka di’ak liu, la’ós ko’alia buat ida iha kampaña maibé to’o ukun halo fali bu’at seluk.
“Malae’ ida dehan, ita Bo’ot sira bele ukun aan ona, maibé sei mosu problema oioin iha imi nia rain tanba imi iha riku-soin iha rai okos. Tanba matenek na’in sira sei hadau-malu kona-ba ukun atu jere imi nia riku soin ne’e. Akontese iha tinan hirak nia laran ne’e hanesan ohin maluk sira hateten ne’e. Los duni, lakohi fó fatin ba ema seluk, lakohi fó dalan ba ema seluk atu ukun, situasaun ida ne’e mak mosu iha ita nia rain. Nia tenke halo tun halo sa’e atu FRETILIN labele ba ukun”, Tara konta tuir.
To’o oras ne’e Tara rasik laiha informasaun diak kona-ba progressu politika ne’ebé la’o iha rai ne’e atu la’o oinsá, maibé tuir nia haree katak, ukun na’in sira hada’u-malu duni atu ukun hodi jere riku-soin iha tasi laran.
“Ba oin ne’e oin sa, tanba impase politika ne’ebé iha ita nia rain ami la iha informasaun, atu la’o oinsa no oinsa maka ita bele la’o. Tanba ha’u fiar katak, matenek balun no matenek barak buka atu taka dalan ba seluk atu ukun. Istória ohin ha’u hateten malae ida hateten ba ha’u ne’e, ida ne’e mak sai agora ne’e. Tenke taka dalan ba balun labele ukun para sira ukun, sira hodi jere riku soin povu Timor Leste nian”, Tara hateten. (*)