Relasiona ba asuntu ne’e Sekretariu Jeral Partidu FRETILIN, Mari Alkatiri hatan, Xanana “seida’uk mehi”, nia ko’alia uluk ona.
“Balun dehan, Xanana hakarak kadoras mai Timor-Leste maibé Marí mak lakohi kadoras mai Timor Leste, maibé ha’u dehan, ha’u kuandu ko’alia kadoras mai Timor Leste, Xanana seida’uk mehi ko’alia kadoras atu mai timor, ne’e ita ko’alia momos,” dehan Marí Allkatiri iha sede Fretilin Komoro, Segunda (7/12).
Alkatiri mós rezeita opiniaun públiku ne’ebé dehan, nia mak pinór tiha soberária TL nian ba tiha Austrália.
“Se dehan, ha’u asina CMATS (Certain Maritime Arrangements in the Timor Sea) ne’e dehan pinór tiha, se ha’u mak pinór karik nia lori osan hira mak ba foti fila fali, tanba konseitu pinór ne’e o tenke lori osan mak foti fali, depois osan ne’e o ba foti iha ne’ebé,” katak nia.
Alkatiri mós dehan, CMATS la’ós nia mak asina, maibé ema seluk ne’ebé la’o ho nia mak asina.
“Ha’u nunka ko’alia tanba ha’u la kaer tan, la’ó ho ha’u mak asina tan, ha’u akompña de’it, ha’u la asina ida, mas ne’e husi hola parte istória, ha’u la kondena ida ne’ebé ba ho ha’u hodi asina ne’e, agora sira tabele hamutuk tiha, dehan ha’u mak asina, mais nia asina loos, ba ha’u ne’e loos,” nia tenik.
Sekretáriu jerál Fretilin ne’e mós kondsidera, asina akordu ne’e estratéjia ida, tanba asina buat ida kee ita hatene ona, ita bele blokeia, para ba segunda parte hodi halo negosiasaun.
“La’ós hanesan planu luta nian ne’e, balun aprezenta hakarak tinan 15 autonómia ho Indonézia depois mak atu halo referendum, ne’e mak estratéjia? Ka ida CMATS ne’e mak la’ós estratéjia fali? Tanba ne’e ha’u dehan, ha’u hakarak kadorasa mai Timor Leste, maibé asuntu ne’e ekonómiku, la’ós polítiku,” nia dehan.
Nia dehan, bainhira estudu viabilidade hatudu katak kadoras mai Timor Leste haburas ekonómia nasaun nian, entaun lori mai.
Maibé kadoras mai Timor Leste mak halo ekonómia namlele, entaun lalika mai. Tanba soberánia Timor Leste nian mak ekonómia tenke buras no povu tomak tenki moris.(*)
