Deputada Elvina ko’alia ne'e tanba nia hare katak, jornalista hamutuk atus ida resin ne'ebé hala'o servisu iha Radio Televizaun Timor-Leste nian Seidauk iha estatutu ne'ebé klaru.

Tanba ne'e, nia konsidera direitu jornalista sira nian ne'e importante no ministériu ne'ebé tutela presiza fó esklaresimentu ba sira nia estatutu prinsipál.

"Ha’u iha kestaun ida, kona-ba jornalista RTTL ne’ebé mak kuaze atus ida (100) ne’ebé halo servisu iha RTTL, sira nia estatutu halo nusa, tanba ita ko’alia kona-ba sira nia direitu, presiza esklaresimentu kona-bá sira nia servisu ," Deputada ne’e koa’lia liu husi intervensaun debate OJE 2021 iha PN, Sábadu (5/12).

Hatan ba kestan ne'e, Ministru Asuntu Parlamentu no Komunikasaun Sosial Francisco Martins Jerónimo haktuir, nia parte mós sei analiza kona-ba salariu funsionariu Permanente inklui traballador sira ne’ebé destakadu iha RTTL.

"Relasiona ho funsionariu permanente ne’ebé mak destakadu iha RTTL, sim los duni sira nia salariu sei mai husi MAPKOMS, no ami hare hela," nia dehan.

Nia haktuir, tempu ne'eba kuandu RTTL muda ba empreza publika desizaun husi funsionariu sira mak desidi, entaun sira ne’ebé hakarak hela nafatin iha RTTL Signifika sira ne'e destaka mai husi ministeriu ne’ebé tutela no sira ne’ebé laiha, entaun sira mai hotu fali iha governu, hodi hala'o servisu hanesan funsionariu publiku.

"Entaun sira ne’ebé ba iha ne'eba sira nia diretu ami nafatin La'o no ami hare hela atu rezolve iha 2021, rezolve lolos tiha para ikus mai sira ne’ebé mak mai reve ho estatutu empreza publika tenke la'o tuir porsesu ne'eba atu nune'e sira hotu iha diretu ho sira nia regalias, no la'o tuir empreza publika, agora sira ne’ebé mak funsionariu publiku, se sira nafatin entaun sira sei hala'o tuir saida mak diretu regalias ne’ebé mak funsaun publika fornese," nia dehan.

Kona-ba jornalista sira ne’ebé muda ba servisu iha funsaun publika, nia rekonese katak, los duni sira agora halo servisu iha ne'eba, maibe iha anu fiskal 2020 ne'e sira nia salariu ne'e sei sustenta no fornese husi MAPKOMS.

"2021 iha ministeriu ne'e rasik, sira nain 33 ne'e sira nia salariu sei la tama iha salariu vensimentu ministeriu nian, tanba ne'e mak iha ministeriu nia osan ne'e menus iha salariu vensimentu ne'e," nia informa.

Nia mós promete sei rezolve kestaun jornalista tanba agora sira loloos ba ona iha funsaun publika, loloos funsaun publika mak sei hare, maibe prontu ida ne'e diskusaun la'o ona.

"Proposta ba sira nain 33 ne'e ministeriu koalia ona ho ministru finansa iha audensia katak proposta ne'e pertinente tanba ne'e diretu funsionariu sira nian, sei la halakom sira nian osan, Simu atu bele aprova iha parlamentu nasional, atu bele tau fila fali iha funsaun publika ninia orsamentu, atu bele selu sira iha tinan 2021," nia haktuir.(*)