Afonso Cortereal nu'udár uma na'in, informa, uma ne'e na'in matebian ona depois entrega fali direitu tomak ba ninia feton.
"Uma ne'e hau nia kuinadu nian no nia mate ona iha 2015, ha’u nia kaben mak toma konta fali mais antes ha’u nia kaben toma konta, hau nia kuinadu nia oan mane mak toma konta", nia dehan iha Akait, Sesta (04/12).
Nia dehan, kontratu ne'ebé uluk ema ne’e aluga uma ne'e halo ho uma na'in hahú iha loron 1 fulan Setembru 2015 to'o 2018.
"Agora 2018 hotu tiha ona, nia lakohi sai, ami husu nia sai, nia hakarak kombina fali hakarak hela tan oitoan, ne'e mak ami dehan la’e tenke sai, tanba familia foti uma ne'e atu hadi'a fali hodi halo negósiu", nia haktuir.
Uma na’in hakarak atu hasai duni tanba ema ne’e halo no monta tan tanki ida iha uma leten (andar), ne’ebé la konsulta ho uma na’in, nune’e uma na’in foti alternativu hasai obrigatóriu.
Kontratu ba uma ne'ebé ema sira husi Pakistaun aluga hodi suku ropa ne'e, kada fulan $1.500, entaun durante tinan tolu hahú 2015 to'o 2018 totál orsamentu rihun $36.
Uma na’in mós informa katak, los duni lisensiamentu ba ema ne’e hodi halo negósiu ne'e SERVE mak fó no, prosesu hirak ne'e iha ona tribunál.
Iha fatin hanesan Jamil Pahad husi Pakistaun ne'ebé aluga uma ne'e informa, durante halo kontratu ne'e ho uma na'in ne'ebé matebian ona la'ós ho sira ida daudaun mai hasai nia ne'e.
"Ami nia kontratu la'ós senora sira ne'ebé ohin ho forsa mai hasai ami ne'e, kontratu ami halo iha tinan 2015 ho matebian, komu uma nain liu tiha ona ba mundu seluk, ami kontinua ho nia oan mane selu kada fulan laiha failansu", nia informa.
Iha tinan 2019, indianu ne’e hatutan, senhora ida mai haruka nia atu sai, derepenti mai haruka tenke sai, maibe ninia atividade halo hela kontratu ho uma nain matebian nia oan mane.
"Sira derepente mai haruka ami sai no taka ami nia atividade, ha’u la rekonese sira, ha’u tuir mak kontratu ne'ebé asina, hau selu ba matebian nia oan mane", nia haktuir.
Nia mós rezeita informasaun ne'ebé uma na'in akuza dehan, durante ne’e la selu.
"Informasaun kona-ba ida ne'e, laloos, tanba durante sira mai iha ne'e loron kalan mak ameasa ami de'it", nia hatutan.
Entretantu, uma ne'ebé daudaun hetan proplema fó serbisu ba timor-oan na'in 8 dezde tinan 2015 to'o agora.