Xefi governu hateten, joven ne'ebé ataka karreta espoza Isabel Ferreira la’ós joven husi área ka bairu Bidau Metiaut, maibé husi bairru seluk ida.

"Ha’u nia kaben tanba ba misa no nia kondutór aflitu, entaun kuaze ha’u nia seguransa alarme polisia sira. Entaun, kazu ne'e sai tiha fali buat ida outru mundu. Mais ha’u husu deskulpa barak no espera katak, kazu ida ne'e labele perturba. Ita hotu hanoin katak, ne'e buat ida ne'ebé organizada, la loos, ne'e simplesmente tanba joven ne'e lanu no Polisia tau matan hela ba ida ne'e," Taur Matan Ruak hateten lia hirak ne’e iha Parlamentu Nasionál Dili, Kinta (3/12).

Taur akresenta, infelizmente akontese maibé PM hateten, kazu refere normal akontese no tenki rekuñese katak, kontribuisaun situasaun joven sira nian iha fatin-fatin, faktu númeru joven aumenta barak, maibé númeru krime ne'e tun.

"Signifika katak sira nia kontribuisaun makaas no ita tenki elojia ida ne'e, mezmu ke ita reprova sira ne'ebé pur razaun liuliu lanu," Taur dehan.

Antes ne'e, iha joven balun ne'ebé ho kondisaun lanu ataka kareta espoza Primeiru Ministru, Isabel Ferreira bainhira kaben husi eis Prezidenti Repúblika ne'e atu ba partisipa misa dadersan.(*)