Login to your account

Username *
Password *
Remember Me

SEFOPE Husu Deputada CNRT "Ko’alia Sukat"

Sekretáriu Estadu Formasaun Profisionál no Empregu (SEFOPE), Alarico do Rosário iha koridor Parlamentu Nasional Sekretáriu Estadu Formasaun Profisionál no Empregu (SEFOPE), Alarico do Rosário iha koridor Parlamentu Nasional Foto File

Tempotimor (Díli)- Sekretáriu Estadu Formasaun Profisionál no Empregu (SEFOPE), Alarico do Rosário husu ba deputada bankada CNRT iha Parlamentu Nasionál (PN) Veneranda Lemos atu "ko’alia sukat" no bainhira asesu informasaun ruma husi ema ruma ko’alia, tenke verifika ho didi'ak molok halo deklarasaun.

Alarico husu ne’e relasiona ho deklarasaun deputada Veneranda Lemos katak, SEFOPE kansela timoroan na’in neen ba Austrália tanba diskonfia la halo juramentu ba partidu KHUNTO.

"Deputada sira hato'o, razaun polítika, deputada sira bele ko’alia hanesan ne'e, maibé loloos ne'e deputada sira labele rona de'it informasaun no ko’alia, maibé tenke buka tuir informasaun loos ne'e iha ne'ebé, tenke mai", Alarico hateten ba jornalísta sira iha nia kna'ar fatin Kaikoli, Kinta (03/12).

Nia dehan, SEFOPE nia odamatan nakloke ba públiku, nu'udár ema politiku no mós ekipa tékniku sira prontu atu hatan.

"Ligasaun ho buat ida juramentu, ne'e buat ida laloos liu mak ida ne'e. Ita labele halo diskriminasaun ba ita nia jovens timoroan tomak", Alarico rezeita.

Nia afirma, ema sé de'it mak tuir ona teste mak nia naran tama iha sistema laran, nia iha direitu atu ba servisu iha Austrália.

"Sé mak dehan nia la ba. Ha'u mak hili nia atu ba ne'e ga. Nia naran tama iha sistema, haruka ba Austrália, sira mak hili no kontratu mai husi Austrália. La'ós kontratu ha'u halo iha Timor, ne'ebé ha'u hili ha'u nia alin ida ne'e mak tenke ba, hili ha'u nia kolega ida ne'e ba, la’e", Alarico esplika ho espresaun tensaun oitoan.

Nia hatutan, bainhira naran haruka fila ona husi Austrália mai TL, governu liuhusi SEFOPE, fasilita deit komunikasaun hodi informa ba kandidatu sira katak sira nia kontratu kompañia ka ajénsia sira haruka ona mai husi Austrália mai TL.

"Ne'ebé la iha tan buat ida be dehan katak ema atu ba, tenke ser juramentu. Ne'e laloos. Traballadór sira ba dala-haat, dala-lima, governu sira uluk mak haruka ba tiha, agora ami haruka kontinua, kompañia haruka mai, ida ne'e ita ba loby tan saida, ema ba servisu di'ak tiha ona, nia tuir tan juramentu ga, ne'e lae", Alarico rezeita dalaida tan.

Entretantu, kandidatu traballadór timoroan hamutuk na'in 162 ne’ebé antes ne’e atu arranka hotu ba Austrália iha loron Kuarta (02/13), iha programa Seasonal Worker Programa (SWP) maibé ikus mai Sekretária Estadu

Formasaun Profesional halo kanselamentu ka hapara derepente de'it kandidatu na'in 6 nia viájen tanba sistema mak la kapta sira nia naran.

Situasaun ida ne'e, hamosu diskusaun oioin husi públiku liu-liu deputada husi banka CNRT Veneranda Lemos ne'ebé dehan SEFOPE halo kanselamentu ba traballadór sira tanba "deskonfia" la halo juramentu ba partidu Kmanek Haburas Unidade Nasional Timoroan (KHUNTO). (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter