Deputadu bankada CNRT Patrocino Fernandes deklara katak, bazeia ba konstituisaun, loloos ne’e governu daualu labele eziste ona, hahú kedan bainhira Primeiru Ministru Taur Matan Ruak hato'o ninia karta demisaun ba Prezidente Republika.
Nune’e, nia hatutan, CNRT desidi sei la rekoñese VIII Governu viabilizadu ida ne’e, tanba ho razaun VIII Governu la eziste ona no laiha fatin atu aprezenta proposta OJE 2020 no 2021.
Pozisaun CNRT, Patrocino dehan, ida ne'e la'ós foin mosu maibé ida ne'e hatudu antes ona iha debate OJE 2020 liubá.
"Bankada CNRT seidauk rekoiñese tanba, ba ami governu daualu ida ne'e la eziste ona," nia dehan.
Maske nune’e, bankada CNRT hili dalan hanesan reprezentante Povu atu garante utilizasaun osan públiku nian tuir lei, no deputadu sira husi CNRT konsiente ba responsabilidade tomak hodi ativamente kontribui ba iha prosesu audiénsia to’o iha debate iha sesaun jeneralidade ida ne’e.
Nia halo Komparasaun ho OJE 2020 nian, Proposta OJE 2021 ida ne’e sa’e 27%, iha aumentu miliaun $406.
“Aumenta osan la reflete ho kapasidade ezekusaun Governu nian, tanba atu remata tinan fiskál (loron 30 fulan-Novembru tinan 2020) Governu foin ezekuta OJE 2020 hamutuk 61.4%, osan ne’ebé la ezekuta hamutuk Miliaun $479,4 ne’ebé sei transita ba iha OJE 2021”, nia haktuir.
Tanba ne’e nia konsidera Governu sei rai osan barak iha tezouro ne’ebé nia jurus sei laiha kompara ho osan iha Fundo Petrolífero ne’ebé sei fó funan to’o 3%.
Bancada CNRT mos lembra istória kapasidade ezekusaun maka billaun $1.2 to’o billaun $1.4 ne’ebé Senáriu ida ne’e mak prudenti liu no bele proteze fundu rezerva ba iha sustentabilidade fiskál. (*)