Deputada ne’e alerta ba Primeiru Ministru (PM) Taur Matan Ruak atu tau atensaun ba SEFOPE ne'ebé halakon direitu sidadaun sira-nian ba Austrália.
Veneranda alerta tanba tuir nia hare katak, antes ne’e timoroan na'in 162 asina ona kontratu atu ba Austrália, maibé kuandu kalan ona, SEFOPE kansela joven na'in neen (6) no bolu hikas ema na'in seluk ne’ebé nunka tuir formasaun mak asina fali kontratu iha tempu kalan.
"Husu ba PM Taur Matan Ruak nia governu defaktu atu tau atensaun ba ita-boot nia membru governu defaktu ne'ebé lori lia-bosok ba ita-boot katak buat hotu loos, mais finalmente laiha buat ida ne'ebé loos. Ema sira ne'e tenke halo juramentu mak foin sai ba liur, Timor-Leste atu ba oin oinsa enkuantu tenke halo juramentu ne’ebé kontra konstituisaun," Deputada Veneranda hateten liuhusi pontu de ordem iha plenária Parlamentu Nasionál (PN), Kuarta (2/12).
Deputada ne'e mós dehan, tuir loloos timoroan na'in 162 mak ba Austrália ohin, maibé hodikalan SEFOPE telefone ba timoroan balun, hodi hasai tiha sira nia naran dehan fali dokumentus balun laloos no balun dehan viza laiha.
"Hodikalan hasai ema na'in hitu, depois haruka ema na'in neen seluk ba asina kontratu kalan, lahatene razaun saida, tanba ne'e mak ema sira ne'ebé tuir ona prosesu kapasitasaun, tuir ona prosesu teste sira ne'e la ba fali, maibé haruka fali ema seluk ne’ebé la tuir prosesu tomak ba asina kontratu iha kalan ne'e," nia dehan.
Deputada CNRT ne'e mós subliña katak, ohin dadersan, SEFOPE telefone ba Aeroportu, hodi hasai tiha timoroan na'in neen ne'ebé atu halo viajem ba Austrália.
"Na'in tolu iha liur dehan viza laiha, maibé na'in tolu seluk iha ona aviaun laran, sira hasai tiha, haruka fali na'in neen seluk ne'ebé la tuir prosesu tomak hodi ba Austrália nune'e ohin ema ne'ebé aranka ba Australia hamutuk 149," nia hateten.
Entretantu, ema na'in neen ne'ebé la konsege ba Austrália kompostu husi mane nain ida no feto na'in lima.(*)
