Joaquim dos Santos hatutan, seitór agrikultura la'ós iha sidade, maibé seitór agrikultura iha área rurais sira, no ema barak ne'ebé mai iha Dili ne'e sira mai husi área rurál, signifika sira husik sira nia abut, knua ne'ebé baze ba agrikultura.

“Tanba ne'e ha'u dehan tenke hadomi servisu hotu-hotu, laiha servisu ida mak di'ak liu servisu seluk, hotu-hotu hanesan," Joaquim dehan iha salaun Delta Nova, Tersa (1/12).

Ministru ne'e mós dehan, agrikultura nafatin sai dezafiu ida, tanba Timor-Leste nia estrutura ekonómia ne'e barak liu mak seitór agrikultura, presiza halo esplorasaun liuhusi kapasidade no forsa hotu.

"Agrikultura nafatin ita-nia futuru ekonómia, tanba agrikultura la'ós de'it haree de'it ba to'os, maibé iha mós pekuária, hortikultura, floresta no dimesaun seluk tan, ne'ebé ita kuandu sai ba ema-nia rai mós, ita iha oportunidade hodi haree, para mai implementa iha ita-nia rai," tenik Joaquim.

Nia mós dezafia joven sira atu haree ba seitór agrikultura hanesan oportunidade ida ne'ebé bele dezenvolve sira-nia kareira, atu hadi'a ekonómia liuhusi potensialidade ne'ebé TL oferese.

Ministru ne'e afirma, atu diversifika seitór agrikultura maka governu fó formasaun, hadi'a joven sira-nia skill, hodi hadi'a ekonómia rai laran liuhusi seitór agrikultura.

"Natar ida atu di'ak presiza irigasaun, konserva ba bee matan sira, nune'e bee bele iha, tanba ne'e atu kuidadu bee matan sira, la'ós responsabilidade governu nian de'it, maibé ema hotu-hotu nian kuidadu," nia dehan.(*)