"Ohin loron taxa dezempregu iha Timor-Leste aas tebes, tanba ne'e joven barak mak buka servisu iha rai seluk atu moris dignu no fó mós moris diak ba sira nia familia iha rai laran", tenik Prezidente Repúblika Francisco Guterres Lú Olo, iha Palásiu Prezidensiál, Bairru-Pité, Tersa (30/4).

Nia hatutan, maski timoroan sira ne'ebé servisu iha rai seluk haruka osan mai no mós sai segundu fonte rendimentu ba Timor Leste, liuhusi buka empregu iha rai liur, maibé tuir loloos ida ne'e la'os solusaun ba problema dezempregu.

"Ha'u apela ba Governu Timor-Leste atu buka lalais dalan atu diveraifika setór produtivu atu hasae produtu traballu iha rai laran. Ne'e urjente tebes atu ita bele manan lalais luta hasoru kiak. Tanba ne'e Governu investe maka'as no uluk liu iha agrikultura, pekuária no turizmu", dehan nia.

Xefe Estadu dehan, liuhusi setór produtivu sira ne'ebé iha bele hamosu empregu barak iha tempu badak. Ho rendimentu mak sidadaun ida-idak bele halo ninia uma kain rasik, ho bee no eletrisidade. Tanba kondisaun bázika importante ba familia ida-idak nia moris diak. Tanba bainhira familia sira moris diak, sosiedade mós moris ho armonia no domin.