Nia haktuir, dalaruma deputadu opozisaun interpreta proposta OJE 2021 hamutuk bilaun $1.8 ne'ebé preve husi governu, ne'e boot liu, maibé bankada governu hare katak osan ida ne'e la boot.
Deputada ne’e deklara, osan ida ne'e ninia valor la boot tanba sistema ida agora, governu mai kedan ona ho orsamentu por programa entaun agora nian labele kompara ona ho orsamentu ida uluk.
Ne'e duni, nia haktuir agora ne'e, tanba CNRT laiha ona governu, bele ko’alia hanesan ne'e tanba uluk kuandu FRETILIN iha opozisaun mós sempre ko’alia hanesan ne'e, maibé agora mai hamutuk atu koopera ho governu ida ne'e, oinsa bele dezenvolve nasaun ne'e ba oin.
"Agora ne'e, tanba ita laiha ona governu, ita bele ko’alia hanesan ne'e tanba ami uluk iha opozisaun mos ami ko’alia hanesan ne'e. Maibé, mai ita hamutuk atu koopera ho governu ida ne'e, atu nune'e ita nia dezenvolvimentu iha nasaun ne'e bele la'o ba oin," deputada ne’e komvida liu husi diskusaun jeneralidade daruak nian ba proposta OJE 2021 iha PN, Tersa (1/12).
Hataan ba kestaun ne'e Deputada bankada CNRT Carmelita Monis konsidera Prezidente Komisaun C Maria Angelica Rangel hanesan komik oituan kritika rasik ninia relatoriu ne'ebé nia rasik aprezenta ba PN.
"Ida ne'e foin pela primeira vez akontese iha Parlamentu Nasionál, tanba relatóriu pareser husi komisaun espesializada sira, haruka ba komisaun C para Komisaun junta hamutuk ho sira nia relatóriu, no depois hato'o mai PN, la'ós mai atu halo julgamentu tanba Komisaun C la'os tribunal no la'os juiz,"
Nia haktuir, komisaun C iha Parlamentu tuir loloos labele halo julgamentu ba relatoriu tanba ema ne'ebé atu deklara ileglidade inkonstituisionalidade, ne'e kompeténsia tribunál nian tuir artigu 26 husi konstituisaun. (*)