Ministru Administrasaun Estatál (MAE), Miguel Pereira de Carvalho hateten, Komisaun Funsaun Públika (KFP) autoriza ona nia atu bele hahú ona halo rekrutamentu foun ba administradór sira hamutuk na’in 61 no sekretáriu munisípiu sira hamutuk na’in 12 iha fulan dezembru nia laran tuir méritu.
"Komisaun funsaun públika autoriza ona ha'u atu halo rekrutamentu pur-méritu, ne'ebé iha fulan dezembru ida ne'e, nomós sei halo rekrutamentu ba sekretáriu munisípiu no administradór munisípiu sira hotu", Miguel Pereira de Carvalho hateten lia hirak ne’e hafoin partisipa iha debate jeneralidade OJE 2021 nian iha PN, Tersa (01/12).
Nia dehan, rekrutementu hirak ne'e sei halo ho fazeadas tanba iha juri ida de'it, kompostu husi sekretáriu munisipal ida no postu nian, nune'e mak labele atende hotu kandidatu ba sekretáriu munisípiu hamutuk nain 12 no administradór postu hamutuk 61.
"Ha'u hanoin iha planu ona, sei hahú uluk husi postu administrativu sira ne'ebé maka ministériu administrasaun estatál sei deside atu hahú, tanba depende ba forsa husi juri sira, mais sei hahú husi munisípiu balun no sei halo ho fazeadas iha fulan dezembru", nia dehan. (*)