"Haruka ona ba konsellu ministru, agora hein de'it konsellu ministru halo deliberasaun desizaun polítika ida para atu bele determina kandidatu ida ne'ebé mak atu sai administradór munisípiu iha munisípiu tolu ne'e", Miguel Pereira de Carvalho hateten lia hirak ne’e hafoin partisipa iha debate jeneralidade OJE 2021 nian iha PN, Tersa (01/12).

Nia dehan, bainhira Konsellu Ministru (KM) realiza enkontru extraordinária ida, parese bele tama ona iha ajenda MAE nian atu substitui, maibé sira sei realiza uluk formasaun ba kandidatu administradór sira.

"Tuir planu, dia 05 fulan ne’e, administradór husi munisípiu tolu ne'e sei mai Dili atu tuir treinamentu iha ne'e, kona-ba oinsá atu halo debate ou diskusaun kona-ba oinsá realiza konsellu konsultivu munisipál hodi diskute kona-ba kandidatu sira", nia dehan.

Iha formasaun ne'e, rasik sei partisipa mós kandidatu administradór sira husi munisípiu Aileu, Kovalima ho Ainaro.

Nia hatutan, bainhira remata formasaun, dala-ruma iha fulan Dezembru nia laran sei realiza konsellu konsultivu munisipal atu nunee sira bele halo ona apresiasaun.

Miguel dehan, konsellu konsultivu munisipál halo de'it apresiasaun ba kandidatura sira ne'ebé aprovadu ona iha faze ezame eskrita.

"Agora, sé iha ona apresiasaun, bele sai ona administradór no ministru estatál konsidera", nia hateten.

Nia mós informa, iha fulan dezembru nia laran MAE sei halo tan rekrutamentu ba administradór munisípiu 5 hanesan Manatutu, Bobonaro, Likisá, Ermera no Díli.

"Iha fulan ida ne'e nia laran, ami sei loke tan ba munisípiu lima tan. Maibé ida sei halo uluk abertura ba kandidatu sira hotu-hotu bele hatama sira nia kandidatura", nia informa.(*)