Deputadu PN Kontinua Preokupa Infraestrutura Báziku Featured

Tempotimor (Dili); Reprezentante povu iha Uma Fukun Parlamentu Nasionál kontinua preokupa ba infraestrutura báziku ba povu hanesan estrada, bee-moos, eletrisidade, irrigasaun no seluk tán ne’ebé to’o agora povu barak mak seidauk hetan no asesu.

Deputadu Gilman dos Santos husi Bankada UDT/FM afirma, estrada públiku sira ne’ebé iha kapitál dili ne’e barak mak kuak no aat ona, maibé to’o bainhira mak bele hadia.

“Estrada iha rotunda Francisco Xavier nian kuak barak loos, inklui iha kruzamentu Audian mós kuak boot. La hatene bainhira mak bele hadia ka tenke aat liu tiha mak foin hadi'a”, intervensaun Deputadu Gilman, iha Plenária PN, Segunda (29/4).

Reprezenta povu ne’e mós husu ba Ministru Obras Públika (MOP) atu labele halo interpretasaun sala ba estrada ne’ebé uza alkatraun sira ne’e kuandu kuak ba taka fali simente, ne’e hatudu imajem la diak ba vizitante sira.

Estrada
Entretantu, Deputadu Domingos Lemos husi bankada CNRT dehan, estrada ne’ebé kompañia konstrui hela rstrada Bilimau-Hatolia tinan barak ona mak kompañia halo maibé monu nafatin no kontinua halo.

“Ministériu Obras Públika tenke tau atensaun ba situasaun ne’e, para se labele ona diak liu hapara tiha kompañia ne’e no fó ba kompañia seluk mak kontinua projeitu ne’e, tanba komunidade sira husi Bilimau to’o mai Hatolia ne’e barak teb-tebes mak hela iha estrada ibun”, tenik nia.

Irrigasaun
Entretantu, kona-ba irigasaun iha Suku Lauhala nian ne’ebé iha tinan lima ba kotuk ne’e halo tiha ona, maibé seidauk finaliza irigasaun ne’e kompañia para tiha, entaun komunidade sira labele halo natar tanba irigasaun ne’e labele fornese bee.

Eletrisidade
Iha fatin hanesan, Deputada Lidia Norberta dehan, komunidade sira Suku Fahilebu, Postu Administrativu Bazartete, preokupa tanba to’o agora povu husi suku ne’e seidauk asesu ba eletrisidade maski suku sira seluk ne’ebé haleu asesu hotu ona eletrisidade.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com