“Hau hetan ona konfirmasaun katak, sim, iha Kuarta feira dia 2 fulan ne’e, aviaun ida ho naran Quantas ne’ebé to’os na’in sira iha ne’e mak aluga, atu ba foti timoroan hamutuk na’in 162 ne’ebé atu mai husi Dili ba Tasmania hodi servisu iha Austrália iha programa seasonal workers”, Inés Almeida hateten ba www.tempotimor.com via telefónika.

Nia hatutan, iha viajen ne’e, traballadór sira sei para iha Brisbane (Capital city of Queensland, Australia) tanba sira tenke kompleta formuláriu kona-ba kustoms no kuarentena antes sira sa’e fali aviaun ba fali Harward.

“Maibé ha’u fiar katak, SEFOPE neste momentu organiza hela ita nia alin sira ne’ebé atu mai servisu iha Tasmania tanba sira tenke halo Covid Test iha Dili antes sira mai no ha’u hein katak, hotuhotu sei iha rezultadu diak no negativu husi Covid”, diplomata ne’e espera.

Durante periudu Covid, nia dehan, iha Asutrália tau destrisaun ba movimentu entre estadu ba estadu, entaun foin daudaun ne’e mak komesa nakloke tanba antes ne’e maski australianu sira rasik hakarak viajen ba hare sira nia familia iha nasaun seluk mós labele, no foin agora mak nakloke inklui nakloke ba ema internasionál atu tama mai iha Austrália.

Nia esplika mós katak, koan-ba traballadór iha seasonal sira, iha Austrália toos nain sira mós husu tanba sira mós agora enfrenta hela problema iha aifuan ne’ebé presija kolleta ona, por ezemplu tempu agora hanesan strowbery, morangus, blackberry, blueberry, no seluk tan iha Tasmania barak tebes no presija ema atu ku’u.

“Entaun to’os na’in sira presija tebes ita nia traballadór sira hanesan sira ne’ebé mak tama iha programa seasonal workers. Baibain, sira haruka mai husi rai barbarak, no baibain ema sira ne’ebé mak mai ferias mak prienxe fatin sira ne’e. Maibé ho Covid, entaun ema la férias nune’e sira labele mai duni no traballadór sira mós la mai. Entaun, to’os na’in sira iha Austrália komesa ona halo presaun ba sira nia governu tanba sira presija duni ema iha situasaun ne’e atu servisu no agora foin mak nakloke duni atu ema husi liur bele tama mai Austrália”, nia esplika.

Embaixadora ne’e mós konsidera Austrália oras ne’e nakloke ona, maibé kada estadu iha ninia xefi ne’ebé depois sei halo desizaun, sei bele aseita ka la’e, no foin daudaun ne’e governu federal mós koordena ho governu

Estatál, entaun ida ne’e sira konkorda katak, bele loke odamatan ba traballadór sira atu bele tama mai servisu iha Austrália.

Antes ne’e, Ministra Negósiu Estranjeiru no Kooperasaun (MNEK) Adalgisa Magno gaba no apresia ho ambaixadora Timor Leste iha Austrália Inés de Almeida ne’ebé ho nia matenek konsege servisu makaas hodi halo loby oinsa mak konvense to’os na’in sira iha Austrália atu kontinua kooperasaun prorama SWP no ikus mai konsege sei haruka timor oan lubuk ida tan ba servisu iha Austrália. (*)

PUBLISIDADE