"Hau ohin mai hasoru Primeiru Ministru ko'alia asuntu primeiru, ligasaun ho ita nia kandidatu traballadór timor oan ba Austrália no Koreia. Ami ko'alia bazeia ba kontratu ne'ebé ajénsia Australiana nian ba trabalaldór hirak ne’e, no ita ko'alia ho Primeiru Ministru kona-ba transporte", Alarico informa hafoin sorumutu ho Primeiru Ministru Taur Matan Ruak iha palasiu governu, Sesta (27/11).

Iha enkontru ne’e ko’alia liu kona ba aviaun atu tula traballadór hirak ne’e ba Austrália tanba problema ne’e iha de’it transporte aero.

"Solusaun ne'e diak, ita tenke halo komunikasaun ho governu Austrália, oinsá ita nia ema sira bele ba", nia dehan.

Nune'e, nia informa, durante sorumutu Primeiru Ministru Taur Matan Ruak aseita totál bainhira joven sira ba serbisu iha Austrália no Koreia.

Nia mos relata, timor oan sei arranka ba Koreia du Súl, maibé sei iha prosesu komunikasaun entre governu Timor-Leste ho Koreia.

"Koreia mak ita sei ko'alia, tanba primeiru ko'alia kona-ba oinsá atu aluga aviaun, tanba razaun ida mak ita aviaun laiha, tenke aluga aviaun ba mai", nia akresenta.

Tanba, tuir nia, bainhira haruka timor oan ba tenke tama kuarentina.

"Kuarentina ne'e mak entre governu Timor-Leste ho Koreia tenke ko'alia halo komprimisiu ida oinsa atu hare, tanba orsamentu ba kuarentena mós boot, tan ne'e sei iha prosesu ko'alia hamutuk", nia tenik.(*)