Login to your account

Username *
Password *
Remember Me

Horta Kontente ho Servisu Amu Élio no Amu Eugénio iha Letefoho

Eis Prezidente da Republika Dr. Jose Ramos Horta foto hamutuk ho Padre nain rua no mos autoridade lokal Eis Prezidente da Republika Dr. Jose Ramos Horta foto hamutuk ho Padre nain rua no mos autoridade lokal Foto Tempo Timor

Tempotimor (Letefoho)- Premiadu Nobel ba Paz, José Manuel Ramos Horta kontente ho servisu Pároku Padre Élio Perreira Fernandes no vigáriu parokiál Padre Eugénio Redentór Marques Caunan Lafo, iha prokia Nossa Senhora do Carmo Letefoho, munisipiu Ermera.

Horta kontente no agradese tanba padre na’in rua servisu diak tebes hamutuk ho autoridade postu, autoridade lokál no sarani sira, hodi kontinua obra sira husi Padre Domingos ‘Maubere’.

“Ha'u agradese ba Amu na'in rua, ne’ebé halo tuir no hatutan Amu Domingos Maubere nia servisu uluk iha ne'e”, José Manuel Ramos Horta agradese ba sarani sira bainhira partisipa missa selebrasaun festa Kristu Liurai iha kampaun Kristu Liurai Letefoho, Domingu (22/11).

Eis Prezidente Repúblika ne’e louva ideia brilante sira husi Padre Domingos Maubere ne’ebé konsege organiza hodi hatuur Kristu Liurai iha laletek Letefoho nian.

“Foin daudaun sa'e mai ne'e, ha'u hateten, tanba sá mak Amu Maubere tau fali estatua iha foho leten ne'e, susar teb-tebes, nusá la tau de'it iha Parókia nian sorin ne'e. Maibé diak tanba ikus mai estatua ne’e sei bele dada ema barak mai iha ne’e”, Horta hateten.

Horta louva ho ideia husi Padre Domingos Maubere nian tanba bainhira sa'e to'o foho Kruz boot Kristu Liurai nia tutun, sente hanesan rekompensa ida.

Horta mós admira, bainhira haree sarani sira kompostu husi labarik kiik-oan sira, ferik sira konsege sa'e too iha foho nia tutun no nia hanoin tanba Nai Maromak mak bolu sira.

Nia mós apresia ba servisu hamutuk entra sarani sira ho igreja, hodi tau ona avizu sira tuir dalan ibun kona-ba bandu buat ne'ebé halo no labele halo.

“Letefoho ne'e di'ak, no furak teb-tebes”, Horta hateten ho espresaun kontente.


Obra husi Padre Na’in rua

 

Entretantu, Pároku Parokia Nossa Senhora do Carmo Letefoho Padre Élio Perreira Fernandes hamutuk ho vigáriu parokiál Padre Eugénio Redentór durante haknaar aan iha p arokia ne’e sempre servisu hamutuk ho sarani sira iha aspetu oioin, liuliu iha servisu sosiál, edukasaun no pastorál konjunta.

Servisu hamutuk ne’ebé padre na’in rua komprova iha asaun pastorál mak hanesan, iha tinan kotuk bainhira selebra tinan 25 ezisténsia parókia ne’e iha loron 16 jullu 2019, konsege organiza sarani sira husi Parókia ne’e ho voluntariamente kontribui fundu hamutuk $110,000.

Husi kontribuisaun ne’e amu sira jere hamutuk hodi hadi’a infraestrutura igreja antiga iha Talala ne’ebé lokaliza iha Suku Haufu, postu administrativu Letefoho, munisipiu Ermera.

Alende ne’e, komisaun organizadora uza fundu ne’e, hodi harii mós moru hale’u fatin misa kampál ho medida aas metru rua no naruk metru 80.

Halo mós monumentu tinan 25 iha eskadaria, no halo reabilitasaun ba Igreja (Parókia), halo tenda misa ba VIP iha fatin misa kampál, reabilita dalan to’o Kristu Liurai, inklui reabilita padre sira nia rezidénsia.

 

Kategoria Kontribuisaun


Fundu ne’e mai husi sarani sira ho kategoria estudante, joven sira, funsionáriu, veteranu, emprezáriu sira, no traballadór Letefoho oan iha Koreia du Sul, inklui sarani balun husi parókia seluk, konta mós ho Jorge Serrano no Dulce da Cunha.

Mekanizmu kontribuisaun ne’e parókia deside, estudante sira iha ensinu báziku kontribui 0,25 sentavu kada ema, estudante sekundáriu 0,50 sentavu, joven $1,00, kada família $5,00, veteranu $50,00 no sarani barak mós oferese material hanesan sementi, rai-henek, fatuk no seluk tan.

Programa ne’e, hanesan programa ida husi programa haat ne’ebé konsellu parokiál hala’o durante tinan ida, iha ámbitu komemorasaun ezisténsia parókia nian ba dala 25, ne’ebé selebra iha loron 16 jullu, tinan 2019.

Iha komemorasaun aniversáriu ezisténsia parókia ba dala 25, komisaun organizadora deside hala’o jornada durante tinan tomak ho tema: Ó Nia Inan mak Ida Ne’e’’ (Jo 19,27).

Tema ne’e sai hanesan mata dalan ba sarani parókia Letefoho atu bele realiza atividade durante tinan ida ne’ebé ninia abertura iha loron 16 fulan Jullu 2018, no ensera iha loron 16 fulan Jullu tinan 2019.

Durante tinan tomak amu na’in rua akompaña sarani sira dezenvolve programa boot haat mak hanesan, programa pastoral, dezenvolvimentu infraestrutura igreja nian, Angriasaun Fundus, ikus liu maka programa arte no kultura.

Amu na’in rua hola inisiativa hodi envolve direta sarani Letefoho “tenke” kontribui duni tanba buat hirak ne’ebé hafurak festa tinan 25, hanesan liman rohan husi sarani rasik, no mós ho kontribuisaun ne’e atu sarani sira bele iha sentidu de pertensia ba parókia, liu tan ida ne’e atu kuda mentalidade ba sarani sira sentidu solidariedade no subsidiariedade.

Sarani sira mós orgullu, kontribui no kolaborativu tebes tanba, parte komisaun organizadora sempre transparente, esplika detallada kona ba gastu no mós iha duni rezultadu fíziku.

 


Atividade Pastorál

Kona-ba atividade Pastorál nian, hahú kedan husi loron 16 fulan jullu 2018, amu na’in rua hamutuk ho sarani sira lori estátua Nossa Señora do Carmo la’o hale’u hodi vizita sarani sira iha aldeia hamutuk 67 ho nia suku ualu (8), ne’ebé pretense ba postu administrativu Letefoho.

Durante vizita ne’e parte Konsellu Parokiál (ajente Pastoral sira) hala’o mós katekeze, formasaun Biblia, devosaun Mariana no pastoral konjunta.

Pastoral konjunta signifika, envolve parte autoridade husi postu administrativu, ho nia departamentu sira hanesan saúde, seguransa, edukasaun no seluk tan, ne’ebé esplika mós kona ba planu governu nian iha postu administrativu ne’e.

Durante pastoral konjunta ne’e ida-idak esplika ninia serbisu ba komunidade no rona preokupasaun husi komunidade rasik, hanesan husi parte saúde esplika kona-ba oinsá importánsia saúde iha moris komunidade, no parte seguransa esplika kona ba oinsá prevene krime iha komunidade. Alende ne’e parte Komisaun Organizadora esplika kona ba sentidu kontribuisaun ne’e rasik, atu nune’e sira bele hatene no kompriende saida mak sira fó la’ós fó iha ignoránsia.


Impaktu direta husi Pastorál Konjunta

Impaktu direta husi pastorál konjunta ne’e, maka, bele redús ona krime balun ne’ebé durante ne’e buras mós iha postu administrativu ne’e inklui violénsia doméstika, aumenta koñesimentu komunidade kona-ba moris saudável, konvense sarani sira atu hatene kontribui ba Igreja ho laran.

Programa ikus liu maka arte no kultura, ho intensaun atu dezenvolve oinsá povu bele deskobre talentu no kapasidade liuhusi realiza kompetisaun oioin hanesan dansa kultura, konkursu múzika tradisionál, múzika relijiozu entre grupu kategoria sira iha parókia.

Ida ne’e mak programa ne’ebé halo eis Prezidente Repúblika no Premiadu Nobel da Pás José Manuel Ramos Horta kontente, no mós sei iha tan atividade seluk hanesan amu na’in rua hari eskola no kontinua tau matan,

inklui buka fundus atu tau matan ba saneamentu báziku sarai sira nian, ne’ebé www.tempotimor sei elabora iha edisaun tuir mai, tanba amu na’in rua nia programa mós sei kontinua. (*)

 

Publisidade

 

Rate this item
(0 votes)
Last modified on Saturday, 28 November 2020 08:32
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter