SEKoop Husu ANAPROFIKO Lalika “Gaba-an”, Tenke Hatudu iha Rezultadu

SEKoop Elizario Ferreira hato'o hela ninia diskursu iha Otel Arbiru Beach (26/11) SEKoop Elizario Ferreira hato'o hela ninia diskursu iha Otel Arbiru Beach (26/11) Foto Espesial

Tempotimor (Díli)- Sekretaria Estadu Kooperativa (SEKoop), Elizário Ferreira husu ba Asosiasaun Nasionál Produtór Fini Komersial (ANAPROFIKO) iha Timor-Leste atu lalika “gaba-an”, maibé tenke hatudu iha rezultadu servisu.

Elizário hato'o nia deklarasaun ne'e, bainhira partisipa iha serimómia lansamentu website ANAPROFIKO nian, inklui halo lansamentu ba merkadu ho naran “Loza Produtu Lokál Timor-Leste”, ne'ebé lokaliza iha aldeia Bebonuk, suku Madohi, postu administrativu Dom Aleixo, munisípiu Dili, kinta (26/11).

“Atu hateten de'it, organizasaun komesa boot, dezafiu mós aumente boot. Entaun, ida ne'e mak ha’u husu, lalika loko aan, servisu ne'e mak sei halo imi nia naran ne'e boot”, Elizário Ferreira hateten.

Nia mós hatutan, bainhira organizasaun ida bele iha nia sustentabilidade ba futuru, presiza iha formasaun ba estrutura sira atu eduka bebeik sira tuir evolusaun merkadu ne'ebé ohin loron eziste.

Nia fó ezemplu, bainhira nia hahú nia kooperativa iha tinan 2000, laiha ema ida mak koñese saida mak kooperativa iha Timor-Leste, tanba lei mós seidauk iha no depois iha tinan 2002 foin aprova konstituisaun tau kooperativa.

“Sé mak hatene tan saida mak kooperativa, maske iha konstituisaun temi, hateten seitór públiku, seitór privádu no seitór kooperativa sosiál”, nia hateten.

Nia konsidera kooperativa nu'udár seitór ekonómika ida ne'ebé mak importante, mais ema barak mak la interrese, maibé iha tempu ne'ebá nia ho kolega sira lao nafatin iha timor, promove nafatin sira nia servisu to'o dignifika sira nia aan-rasik.

Entretantu, Prezidente Asosiasaun Nasionál Produtór Fini Komersial Timor-Leste (ANAPROFIKO-TL), Filipe Mendonça esplika, objetivu husi lansamentu ne'ebé sira hala’o nu’udár parte husi sorumutuk ba daruak nian entre komunidade agrikultór sira ka “II Farmers Forum TL”, ne’ebé halo ho objetivu tolu mak hanesan, lansamentu “Loza Produtu Lokál TL, website Anaprofiku ho semináriu.

“Ami nia merkadu pela primeira vez foin mak estabelese ne'e, uluk ami nia merkadu ne'e ida mak governu de'it, ministériu agrikultura mak halo liuhusi produsaun fini, fini hotu, depois governu fó tender ba kompañia sira manan, depois sira mai hola ami nia merkadu ida de'it mak iha ministériu agrikultura”, nia hateten.

Nia hateten, ho lansamentu Loza Produtu Lokál nee iha ona, halo sira komesa loke tan ona liras ida hodi bele konserva fila-fali fini sira ne'ebé governu halo la hotu no restu sira nee sira aloka fali ba iha diversifikasaun ai-han sira hanesan batar ikis, batar uuk, batar fai alende nee mós ho forefungu, forekelin sira hodi halo diversifikasaun ai-han iha timor-leste.

“Ami nia konsentrasaun programa espesifiku nee maka produsaun fini. Ida segundu nee maka ita haree ba merkadoria ne'e komesa menus ona ne'e maka ita hodi kria fali loza produtu lokál iha TL ne'e, para ai-han sira ne'e bele, sira produz iha ne'ebá karik ita mai iha Dili nee ita nia fatin iha para tau sasán. Ida nee maka ami alarga fali ba produtu lokál TL nian”, nia esplika.

Nia mós hatutan, liuhusi “Loza Produtu Lokál”, sira bele halao sira nia misaun ne'ebé loloos nhodi defende kona-ba soberania fini no mós seguransa ai-han iha TL.

“Objetivu primeiru ba soberania fini nee ami halo hotu ona, ne'e maka tinan lima ona ate a data ami hapara fini importasaun husi rai liur, i segundu maka seguransa ai-han iha TL”, nia tenik.

Entretantu, ANAPROFIKO estabelese iha loron 15 fulan Marsu 2015 ne'ebé dadaun ne'e ninia asosiasaun sira maioria eziste hotu iha munisípiu 12 inklui RAEOA, ho totál membru hamutuk 5700-resin.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« January 2021 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks