Xefe governu hato’o asuntu ne’e hodi responde preokupasaun Xefe Estadu Maiór Jenerál FALINTIL Forsa Defeza Timor-Leste (F-FDTL), Lare Anan Timur ne’ebé antes ne’e husu ba Prezidente Repúblika (PR) Francisco Guterres Lú Olo no Xefe Governu Taur Matan Ruka atu ukun to’o baze, la’ós preokupa de’it ho estrutura iha leten.
"Liurai sira iha Ministériu Administrasaun Estatál nia okos, la'ós Primeriu Ministru mak komanda liurai sira. Tanba ne'e ha'u rejista preokupasaun, atu MAE ho Administradór sira kontinua tau matan ba liurai sira, tanba ne'e tuir eskalaun," PM Taur hateten ba jornalista sira iha Palásiu Prezidensiál Bairru-pite, Kinta (26/11).
Xefe governu ne'e dehan, labele ba hamos estrada mós Primeriu Ministru (PM) mak ba, depois ba ukun iha suku, ne'e la'ós, ida-idak iha ninia responsabilidade atu kumpri.
Antes ne’e, Lere Anan Timur preokupa tanba tuir nia hare katak, xefe suku barak mak mai pasiar no buka de'it projeitu iha Dili, maibé laiha responsabilidade ba povu iha baze.
"Governu tenki ukun to’o baze, labele abandona iha kraik, preokupa de'it iha leten, tanba ami haree ba ne’e koa'lia kona-ba estabilidade nasionál tenki mai husi baze," Lere ko’alia asuntu ne’e hafoin hasorumalu ho Xefe Estadu iha Palasiu Prezidensial Bairrupite Kuarta ne’e.
Jenerál ne'e mós dehan, xefe suku tenki kontrola nia suku no xefe aldeia tenki kontrola nia aldeia, maibe to’o agora, xefe suku no xefe Aldeia barak mak laiha responsabilidade, tanba laiha ema ida husu responsabilidade ba sira. (*)
PUBLISIDADE