Print this page

Lere Ejize PR Lú Olo ho PM Taur Ukun To’o Baze

By November 26, 2020 1501
Xefe estadu maiór F-FDTL, Maijór Jenerál Lere Anan Timur ko'alia ba Jornalista sira iha Palasiu PR (26/11) Xefe estadu maiór F-FDTL, Maijór Jenerál Lere Anan Timur ko'alia ba Jornalista sira iha Palasiu PR (26/11) Foto Midia PR

Tempotimor (Dili)- Xefe estadu maiór F-FDTL, Maijór Jenerál Lere Anan Timur ejize ba Prezidente Repúblika (PR) Francisco Guterres Lú Olo no Primeiru Ministru (PM) Taur Matan Ruak atu ezerse kompeténsia ba povu nia moris diak, liuliu tenke ukun to’o baze.

Lere Anan Timur hato'o lia hirak ne’e iha Palásiu Prezidensiál Bairu pité, hafoin enkontru semanál ho PR Lú Olo, Kuarta (25/11).

"Governu tenki ukun to’o baze. Labele abandona iha kraik, preokupa de'it iha leten, tanba ami haree ba ne’e koa'lia kona-ba estabilidade nasionál tenki mai husi baze," Lere hateten ba jornalista iha Palásiu Prezidensiál bairru-pite, Kuarta (25/11).

Jenerál ne'e mós dehan, xefe suku tenki kontrola nia suku no xefe aldeia tenki kontrola nia aldeia, maibe to’o agora, xefe suku no xefe Aldeia barak mak laiha responsabilidade, tanba laiha ema ida husu responsabilidade ba sira.

"Ezemplu ha’u hanesan komandante jerál forsa armada ninian, ha’u semana semana hala'o reuniaun ho ha’u nia komandante komponente sira, ha’u husu responsabilidade ba sira, sira tenki kontrola ida-idak ninia komponente, komandante hotu-hotu ita koñese ninia soldadu, koñese soldadu ne’e servisu di'ak kalae, ninia familia moris di'ak kalae," Lere ko’alia.

Lere subliña, estadu tenki halo hanesan ba xefe suku sira, tanba balun mai pasiar hela iha Díli, buka bisnis ka tender bainhira mak atu manan, bele dehan TL ukun aan ona ida-idak moris tuir nia hakarak.

"Ami-nia preokupasaun ami hato’o hela ba PR, ema hotu-hotu asumi kargu estadu nian no governu nian, tenki asumi mós nia responsabilidade, ha’u seguransa nian ha’u tenki iha seguransa, ha’u kumpri devér nu'udar seguransa, kuandu ha’u hamrik iha seguransa ha’u la haree ba oin o mutin ka o metan, no o boot ka o kiik, ha’u kumpri ha’u-nia devér nu'udar seguransa," Lere hateten.

Lere preokupa katak, Timor ukun aan besik tinan 20 ona, ne’e la’ós foin mak ukun-aan tinan ida ka rua, tanba ne’e presija atu hadi'a.

"Ami husu mós ba PR, ne’e última faze ukun timor ba ita mak ne’e ona. Tuir mai jerasaun foun mak ukun ona. Mais ita kuandu la halos buat sira ne’e, aban bainrua ita sei sai sabraut. Dalaruma ami barak tur hamutuk dehan di'ak liu ita haruka ita-nia oan sira ne’e ba rai liur, duké hela iha timor par aban bainrua moris iha konfuzaun nia laran," Lere espresa.

Entretatu, Lere mós kontinua espresa ninia konfiansa ba ba PR Lú Olo no PM Taur, tanba nu'udar veteranu ne'ebé hatene povu.

"Ha’u fiar ita-nia PR no PM, sira nu'udar veteranu apoiu tomak ami nian, mai sei halo timor ne’e lao tuir dalan ne’ebé loos no dalan ne’ebé di'ak ba prosperu no estabilidade iha ita-nia rai laran," nia dehan.

Kona-ba preokupasaun sira ne'e, nia dehan, PR Lú Olo konfirma katak, sei uza kompeténsia ne'ebé iha hodi deside ba povu nia moris di'ak.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items