Nia dehan, presiza sukat sensibilidade politika, tanba sai diplomata reprezenta estadu.
"Ida ne'e kritika husi deputadu sira, ne'ebé embaixadór tenke laran luak simu, tanba nia mak posting buat ida iha públiku, depois deputadu sira kritika, entaun nia responsablidade par hatan kritika ne'e", Adalgisa Magno hateten lia hirak ne’e hafoin reuniaun Konsellu Ministru iha palasiu governu, Kuarta (25/11).
Tuir MNEK, embaixador Ilidio Ximenes halo promosaun ba lider nasionál laiha problema, agora nia mak tenke sukat sensibilidade politika.
"Agora laiha problema ba pontu de vista hau nian par nia halo promosaun ba ema ruma. Mais agora nia tenke sukat sensibilidade politika, tanba nia embaixadór tenke defende ema hotu intrese estadu nian, entaun nia tenke públika igual, lider hotu eh asuntu governu", nia esplika.
Nia akresenta, atu hala'o buat hotu tuir dalan, diplomata ida-idak mak jere ninia servisu, maske nune'e, públikasaun ne'ebé embaixadór Ilidio Ximenes halo promosaun ba lider nasionál ne'e la viola regra ruma.
"Ida ne'e la viola, agora ha’u dehan ne'e sensibilidade politika, nia reprezenta embaixadór reprezenta estadu, agora deputadu sira kritika ne'e iha direitu", nia relata.
MNEK mós rekoñese katak, iha karta koñesimentu ne'ebé antes ne’e embaixadór Ilidio Ximenes halo promosaun ba lider nasionál.
"Sim, ha’u simu husi MNEK sira nian, nia informa ba sira tékniku", Ministra ne’e rekoñese.
Antes ne'e, deputadu sira husi bankada Fretilín ezije ba governu atu ezonera embaixadór Ilidio Ximenes ne'ebé reprezenta Timor-leste ba hala'o misaun diplomata iha nasaun Japaun halo públikasaun ida liu-husi pajina Facebook kona-ba lider nasionál Kay Rala Xanana Gusmão ne'ebé hato'o mensajen ba aniversáriu ONU ba dala 75. (*)