"Ohin ha'u mai despede PR Lú Olo, tanba semana oin ha'u sei remata ha'u-nia misaun, entaun mai aproveita oportunidade hodi ko'alia ho PR Lú Olo kona-ba relasaun TL ho Brasil nian," Embaixadór Aldemo hateten lia hirak ne’e hafoin despede PR Lú Olo iha Palásiu Prezidensiál Bairru-pite, Kuarta (25/11).
Embaixadór ne'e mós sente kontente tebes, tanba durante tinan haat nia laran servisu di'ak tebes ho Timor-Leste liuhusi kooperasaun téknika sira.
"Kooperasaun téknika mak liga liu ba kooperasaun bilaterál entre nasaun rua ne'e, komesa TL ukun-aan iha 2002, Brazil implementa ona projeitu kuaze 100 iha TL iha seitór oioin ne'ebé liuhusi Ajensia Kooperasaun Brazileiru (ABC)," nia dehan.
Projeitu prinsipál sira mak kona-ba konsolidasaun ba estadu nasionál Timorense.
“Ami mós kontente tanba iha tan ona kooperasaun tékniku foun hanesan Komisaun Anti Korupsaun (KAK) iha TL, depois iha mós estabelisimentu programa maestradu ba lian Portugeza iha UNTL liuhusi Universidade Fedaral da Santa Catarinha do Brazil”, nia espresa sentimentu kontente.
Iha mós kooperasaun foun ho Komisaun Funsaun Públika (KFP) atu hanorin lian Portugueza ba tékniku sira iha administrasaun públika iha TL.
Iha kooperasaun ida ne'ebé importante liu mak iha área agrikultura nian tanba empreza Brazil ida ne'ebé halo peskiza iha área pekuária.
“Entaun halo kooperasaun ho TL, ha'u mós iha artigu ida iha Timorpost katak importante liu Brazil halo kooperasaun ho TL iha seitór agrikultura," Aldemo dehan tan.
Embaixadór ne'e subliña, importánsia husi Brazil halo kooperasaun ho TL iha seitór agrikultura tanba, iha 1970, Brazil mak impprtadór ne'ebé barak liu iha parte hahan nian.
"Ami iha esperiénsia barak, tanba iha tinan 1970 nian, Brazil mak nasaun ne'ebé halo importasaun boot liu, entaun grasa ida tanba liuhusi peskiza agro-pekuária Brazil sai trasnformadór aas liu iha mundu. Hanesan agora, Brazil importadór aas liu kona-ba batar, naan no produtu agrikola seluk tan," embaixadór ne'e esplika.
Nia mós afirma, TL presiza rezolve kestaun seguransa alimentár nian atu sai nasaun ne'ebé mak iha alimentu sufisiénte.
"Ida ne'e la'ós fasíl, maibé liuhusi kooperasaun, bele hala'o projeitu barak kona-ba melloramentu aifarina, batar, introdusaun ba modernizasaun agrikola iha TL, prinsipalmente kona-ba kestaun agrikola familia nian iha suku sira, ida ne'e mak kampu ne'ebé importante, tanba ne'e presiza iha kooperasaun barak iha área ida ne'e," nia dehan.
Nia mós informa katak, iha enkontru ikus, PR Lú Olo simu ho haksolok no konkorda ho planu kooperasaun sira ne'ebé Brazil halo ho TL.
"PR Lú Olo simu, entaun nia mós dehan, TL presiza rezolve kestaun seguransa alimentár, entaun bainhira pandemia ida ne'e mak liu ona no fulan ne'ebé sei mai, hahú haree ona ba ajénsia kooperasaun brazileiru nomós haree ba kooperasaun tekniku Embrapa ba empreza brazileiru ne'ebé halo peskiza iha agro-pekuária nian, atu halo levantamentu ba seitór agrikola iha TL," nia dehan.
Entretantu embaixadór foun husi Brazil ne'ebé sei troka atuál embaixadór iha TL ne'ebé sei termina nia misaun iha semana oin, iha loron 14 to'o ona TL para kontinua servisu ne'ebé durante tinan haat ha'u halo ona iha TL.(*)
