Marí Alkatiri afirma lia hirak ne'e hafoin sai oradór ba semináriu nasionál iha Institute of business (IOB) fomentu ho tema valór polítiku no estratéjiku Proklamasaun Independénsia RDTL 28 Novembru 1975.

“Ha’u dehan ona ba PM Taur Matan Ruak, kuandu ami hasoru malu, ha’u dehan buat ne’ebé importante liu mak iha 2021 ba oin ita define polítika nasionais, ita agora ko’alia de’it mak minarai, mais bee atu maran ba bei-beik, entaun bainhira mak ita atu halo polítika nasionais ba bee, halo nusa mka ita satan tiha bee iha tempu udan, para bele uza iha tempu bailoron,” dehan Marí Alkatiri iha salaun IOB Fomentu, Tersa (24/11).

Sekretaríu Jerál Fretilin ne’e mós dehan, tuir bei-ala sira katak, ema-nia mós iha fatór tolu ne’ebé bazikamente kada loron ema uza.

“Ita-nia bei-ala sira uluk dehan kedas, vida ne’e iha elementu tolu, mak hanesan rai, bee no ahi. Rai ho bee lori hahan, ahi para atu te’in, ne’e importante, kontinua mantein, entaun ita tenke iha polítika nasaionál ba bee, rai no enerjía,” nia dehan.

MA mós afirma, husi meiu tolu ne’e mak iha ona polítika nasionál, mak sei lori dezenvolvimentu Timor-leste ba oin.

“Atu debate polítika nasionál ba seitór sira ne’e, tenke iha vontade, buka kompriende malu iha iha konsensu nasionál, ne’e estruturan ba ita-nia rai ba oin, se lae aban aban-bainrua minarai bele tama barak ka lae, maibé se bee laiha ita halo saida, entaun polítika nasionál ne’e importante,” katak Alkatiri.

Alkatiri mós subliña, tenke halo mudansa oituan ba estilu governasaun nian, maibé tenke fundamentál.

“Ukun para hateke ba oin, atu lori saida mak atu kore ita husi ki‘ak no mukit ne’e la’os ezmola, la’ós mós kariedade mós, maibé dezenvolvimentu,” katak nia.

Alkatiri akresenta, Timor atu la’o ba oin bainhira ema hotu hanoin hanesan ba kestaun estratéjiku, kestaun estruturante, se laran metin estadu, maka nasaun sei la la’o ba oin, tanba ne’e joven sira presija haree ba oin para mundu internasionál nafatin respeita ita.(*)