Nia dehan, maski mosu situasaun impase polítika iha rai laran no akompaña ho situasaun globál surtu COVID-19, maibé governu nafatin esforsu to’o reliza duni sira nia promesa.

“Hanesan lider komunitáriu ami agradese ba governu tanba mezmu ita atravesa polítiku oioin, maibé governu konsege realiza duni programa ida subsídiu nian ba komunidade. Tanba ne’e, direitu sira nian, ami agradese” Matos da Costa ba www.tempotimor.com iha sede suku Camea bainhira halo akompañamentu ba prosesu pagamentu subsídiu Covid-19 ba komunidade iha bekora, Tersa (24/11).

Nia dehan, maski povu hein kleur durante fulan tolu nia laran tanba situasaun emerjénsia, maibé nia iha esperansa katak ba futuru sei mellora diak liu tan servisu no programa sira atu labele akontese tan situasaun hanesan, tanba komunidade mak sai vitima liu.

“Ita agradese nafatin ba esforsu tomak ne'ebé governu halo”, nia dehan.

Nia mós rekomenda ba governu, la'ós obriga, maibé rekomenda de'it, katak governu tenke haree no prosesa dadus sira ho diak no loloos nune'e komunidade hotu iha direitu ba hetan subsídiu ida ne'e.

“Tanba sira sente katak hanesan sidadaun ida nia maluk hetan, sira la hetan, entaun sira sente katak sira triste oitoan, maibé ami fiar nafatin ba governu sei rezolve problema sira ne'e”, nia dehan tan.

Autoridade suku ne'e mós mós agradese dala-ida tan governu tanba tempu badak mós sira sei hetan tan apoiu ida sexta bázika, tanba ne'e sira fiar governu iha esforsu duni ba komunidade sira nia interese, ida nee maka ita fó importansia ba ida ne'e.

Benefisiária, Leliana Sousa Ferreira sente haksolok tanba governu la taka matan ba sira nia terus durante infrenta situasaun estadu emerjénsia no konsege halo pagamentu ba sira.

“Sente kontente, tanba ida ne'e bele ajuda netik ami nia nesedidade ba uma-laran nian, hodi sosa mós sasán seluk ne'ebé ami presiza”, nia dehan.(*)