Tuir Alkatiri, problema entre lider nasional sira husi 1974/1975 nian mosu kuandu Parlamentu Nasionál (PN) aprova artigu 1 Konstituisaun Repúblika Demokrátika Timor-Leste iha alinea 2 ne’ebé ko’alia kona-ba loron 28 Novembru 1975 mak loron proklamasaun independensia RDTL.

“Bainhira artigu 1 husi K-RDTL aprova, ne’e xoke boot ba maluk balun no xoke mós ba Nasoins Unidas. Entaun, husi ne’e kedas ita haree katak lidér sira balun husi 74/75 duni la konkorda. Hakarak ita haluha 28 Novembru 1975, atu proklama foun fali Prokalamasaun Independénsia foun, maibé ha’u dehan la’e, nusa imi la kandidatu aan ba konstituente, tanba konstituente mak iha soberanu. Entaun, problema hahú iha nee” Mari Alkatiri hateten ba estudante sira iha semináriu nasionál ne’ebé hala’o iha saun IOB Fomentu, Tersa (24/11).

Marí mós dehan, diferénsia ideolójia ho Xanana ne’e iha, maibé laiha problema pesoál entre ami-na’in rua.

“Hau laiha konflitu ho Xanana Gusmão, konflitu pesoál, ha’u laiha, konflitu ba hanoin, vizaun, prosesu nee iha, esforsu komaea halo iha 2010, fó insidénsia parlamentár hodi apoiu ba V governu konstituisionál neebé lidera husi Xanana,” Alkatiri dehan.

Marí mós dehan, tentativa hodi hadia ne’e halo ona dala barak, maibé laiha rezultadu.

“Hau seidauk halo perseguisaun ba Xanana, iha ona auditória lubuk ida iha hau-nia liman, maibé ha'u seidauk uza, Xanana uluk uza ona, to'o iha PN halo tan rezolusaun para ha'u tenke ba hatán iha tribunál, maibé ha'u seidauk halo ida ne'e, mais justisa tenke iha,” nia dehan.(*)