Husi númeru 815 ne'e, benefisiáriu na’in 663 mak simu ona sira nia subsídiu ne'ebé selu diretamente husi Ministériu Solidadriedade Sosial no Inkluzaun (MSSI), iha Tersa (24/11).
Xefi suku Camea, Matos da Costa hateten, suku Camea kompostu husi aldeia 13, maibé aldeia rua hanesan Ailele Hun no Haas-Laran mak sira nia naran laiha ka lakon, no balun halo reklamasaun.
Nia hatutan, tuir dadus husi komunidade aldeia rua ne'ebé naran lakon no reklamasaun hamutuk 663 ne'ebé aprovadu tiha ona hodi halo pagamentu.
“Ami paga tiha 663, signifika sei falta 100-resin mak seidauk. Ida ne'e tama iha lista reklamasaun. Mais ne'e ha'u hanoin governu sei haree didiak, tanba dadus barak mak iha, governu sei haree didiak, depois ami fiar katak tempu badak sei iha pagamentu ba reklamasaun sira”, Xefi Suku Camea hateten.
Matos da Costa ba www.tempotimor.com iha sede suku Camea durante halo akompañamentu ba prosesu pagamentu subsídiu Covid-19 ba komunidade sira iha Bekora, tersa (24/11).
Nia haktuir, suku Camea iha aldeia 13, maibé iha prosesu pagamentu ba subsídiu Covid-19 ninian sira halo de'it pagamentu ba aldeia 11, no aldeia rua maka falla tanba lista lakon, tanba ne'e maka sira prosesa kleur kuaze fulan tolu.
“Mais governu konsege halo pagamentu duni ba loron ohin no aban, no sira seluk ne’ebé tama iha reklamasaun ne'e, ami hanoin iha faze ikus”, nia dehan.
Nune’e mós komunidade suku Camea, José Xamara Costa kontente tanba reklamasaun ne'ebé sira hatama to’o ikus governu konsidera duni sira nia direitu hodi halo pagamentu.
“Iha pagamentu primeiru bainhira rona naran laiha, ha'u sente ladun satisfás ho prosesu ida ne'e, maibé ohin sira konsege mai fahe duni ba ami”, nia ko’alia kontente.
Pagamentu subsídiu ba komunidade sira hala'o durante loron rua, tersa ho kuarta, ba loron dahuluk fahe uluk ba aldeia Ailele Hun no tuir fali maka aldeia Haas-Laran.
Entretantu, suku Camea iha suku 13 mak hanesan Aidak Be Hare, Ailele-hun, Ailok-laran, Bedois, Dudur Lau, Caisabe, Fatuk Francisco, Haslaran, Lases, Lenuk Hun, Namalai, Suco-Laran, no Terminal.
Tuir dadus ne'ebé rekolla durante prosesu Covid-19, totál populasaun iha suku Camea hamutuk 16.325, ho xefi familia hamutuk 3.109.(*)