Iha serimónia tomada de pose ne'e, PR Lú Olo dehan, povu iha espetativa boot tebes katak, Ministru foun Rui Gomes ho knaar nu’udár Ministru Finansas, sei husik marka pozitiva no ezemplár ba VIII Governu no ba nasaun.

"Atu hala’o di’ak knaar sira ne’ebé nia simu ho pose ida ne’e, Rui Gomes sei haktuir matadalan prinsipál sira hanesan programa governu daualu nian, Planu Rekoperasaun Ekonómika no ninia espresaun iha Orsamentu Jerál Estadu 2021 ne’ebé sei aprova husi Parlamentu Nasionál," PR Lú Olo hateten liuhusi nia diskursu hafoin fó pose ba Rui Gomes nu'udár MF, Segunda (23/11).

Xefe esadu ne'e afirma, "hosi ohin ba oin, ita-boot hasoru dezafiu foun ida iha ita-nia vida politika no profisionál. Atu ko’alia Ioloos, ami kompreende katak, knaar ne’e todan ba ita-boot, maibé señor ministru! Susesu ba misaun ida ne’e la’ós depende de’it husi ita-boot maibé depende mós ba apoiu husi ita-boot ninia familia direta no husi ema hotu ne’ebé loron-loron hale’u ita-boot," Lú Olo dehan.

PR Lú Olo mós fiar, Ministru Finansas (MF) Rui Gomes, sei lori ksolok no hamenus efeitu husi Covid-19 nian iha tempu badak.

"Ita-nia knaar nu’udár MF ba implementasaun Planu Rekoperasaun Ekonómika sei simu ksolok husi hotu-hotu ne’ebé hahú hala’o ona misaun murak atu hamenus efeitu husi covid-19 iha tempu badak no kontribui ba rekoperasaun ekonomia nasionál," dehan subliña.(*)