"Dr. Rui Gomes iha esperiénsia ne'ebé boot no dezempeñu di'ak iha funsaun públika no ezekutiva ne'ebé ohin toma pose. Ha'u nia pontu devista katak, Rui Gomes mak ema ne'ebé merese duni lidera Ministériu Finansas to'o governu nia mandatu remata," PM Taur hateten lia hirak ne’e bainhira partisipa serimonia tomada de pose ba Ministru Finansas foun Rui Gomes iha palasiu Prezidensial Bairrupite, Dili ohin.
PM Taur mós kongratula Rui Gomes tanba ho nia prontidaun hodi asume responsabilidade todan ne'e.
"Ha'u nia deseja no susesu iha ita-boot nia mandatu, nomós hakarak agradese ba vise MF Sara Lobo Brites ne'ebé durante ne'e asume knaar hotu MF nian. Kontinua servisu hamutuk ho Rui Gomes ne'ebé iha koñesimentu kle'an kona-ba funsionamentu di'ak," Taur dezeja.
PM Taur mós haktuir katak, MF sesante Fernando Hanjam la konsege kontinua, tanba kondisaun saúde ne'ebé la permite.
“Nune'e iha loron 5 Novembru MF sesante Fernando Hanjam hato'o nia karta demisaun ba PM Taur Matan Ruak hodi husu atu demite nia husi kargu MF nian”, Taur informa.
Atuál Primeiru Ministru ne’e mós agradese ba Sekretáriu Jerál Partidu Fretilin Marí Alkatiri, Konselleiru Másimu KHUNTO José dos Santos Naimori Bucar, tanba ho komunikasaun di'ak hodi hili hikas Rui Gomes atu asume hikas Ministru Finansas iha governu konstituisionál da-ualu.(*)
