Xefe suku Uaimori hateten, horiseik (22/11) iha tuku 17:00 lokraik liuhusi WhatsApp ba xefe suku sira katak, ohin xefe suku akompaña reklamante sira ba iha vila parte Banku Nasionál Comércio Timor-Leste (BNCTL) hodi simu direitu osan subsídiu ba Covid-19 nian, maibé bainhira to'o iha sukursal BNCTL, osan laiha.
"Horseik lokraik pelumenus tuku 17:00 lokraik, Administradór Munísipu mai postu fó hatene katak, ohin 23 Novembru ne'e, xefe suku, OPS hamutuk ho reklamante sira atu mai foti osan Covid-19 nian iha banku, entaun ami cek iha banku, maibé dehan osan laiha, ami mós halo konfirmasaun ho banku, maibé sira dehan, seidauk hetan orientasaun ruma husi superior. Ami konfuzaun ho informasaun ne'e loos ka falsu ami mós seidauk hatene," Xefe Suku Uaimori Francelino ba www.tempotimor.com liuhusi telefónika, Segunda (23/11).
Xefe suku ne'e mós informa katak, familia reklamante iha suku Uaimori hamutuk na'in 18.
"Iha ha'u-nia suku hamutuk na'in 18, agora ami iha hela banku BNCTL, balun la'o kalan boot hodi to'o iha ne'e, maibé ami to'o tiha iha ne'e dehan fali osan laiha," nia hateten.
Jornalista www.tempotimor.com koko konfirma ho administradór postu administrativu Vikeke António Grigório, maibé nia parte dehan, hala'o de'it orden husi Administrador munisípiu Vikeke nian.
"Kona-ba pagamentu ba dadus reklamente ne'e to'o agora ha'u de'it seidauk hetan informasaun kona-ba data pagamentu ninian, maibé tan ba horseik administradór munisípiu Vikeke nian mak sms ha'u katak, orienta xefe suku sira, ohin akompaña pagamentu ba reklamante sira iha BNCTL, entaun ha'u informa de'it ba xefe suku sira, maibé informasaun ne'e ha'u mós seidauk hetan," António dehan.
Entretantu, totál reklamente iha postu administrativu Vikeke hamutuk na'in 386 no suku Uaimori de'it iha na'in 18 ho totál populasaun suku Uaimori nian hamutuk 2.329 no totál uma-ka'in 514 kompostu husi feto 1.141 no mane 1.188.
Entretantu, jornalista www.tempotimor.com koko konfirma duni ho Administrador Munisípiu Vikeke Grigório Henrique liuhusi telefónika, maibé la atende.(*)
